ගැසට් පත්‍රයේ සඳහන් නිර්ණායක උල්ලංඝනය කරමින් විදුලි වැටක් ඉදිකිරීම තුළින් වනජීවී දෙපාර්තමේන්තුව කුඹුරු වගාවන් රැසකට බරපතළ හානි පමුණුවා ඇති බවට චෝදනා කරමින් ප්‍රථම වතාවට මෙරට අධිකරණයක පවරා ඇති නඩුව මේ මස 14 වැනි දින විභාගයට ගැනීමට අනුරාධපුර දිසා විනිසුරු සහ අතිරේක මහේස්ත්‍රාත් සම්පත් හේවාවසම් මහතා නියෝග කළේය.
අනුරාධපුර එක්සත් කෘෂිකර්ම සංසදයේ සභාපති විශ්‍රාමික සහකාර කෘෂිකර්ම අධ්‍යක්ෂ 84 හැවිරිදි ආර්.එම්. නවරත්න බණ්ඩා මහතා අධිකරණය හමුවේ පවරා ඇති මෙම නඩුවේ වගඋත්තරකරුවන් ලෙස වනජීවි දෙපාර්තමේන්තුවේ අධ්‍යක්ෂ ජනරාල් ආචාර්ය චන්දන සූරිය බණ්ඩාර සහ නීතිපති ජනාධිපති නීතිඥ සංජය රාජරත්නම් යන මහත්වරුන් සහ වනජීවී දෙපාර්තමේන්තුව නම් කර තිබේ.
නඩුව කැඳවූ අවස්ථාවේ වගඋත්තරකරුවන් වෙනුවෙන් පෙනී සිටි රජයේ අධිනීතිඥ මොහිදීන් ෆායිෂ් මහතා අධිකරණයට කියා සිටියේ මෙම නඩුව විභාග කිරීමට අනුරාධපුර දිසා අධිකරණයට අධිකරණ බලයක් නොමැති බවය. නඩුවට අදාළ ප්‍රදේශය පිහිටා ඇත්තේ කැකිරාව දිසා අධිකරණ බලප්‍රදේශයේ බවද ප්‍රකාශ කළ රජයේ නීතිඥවරයා ඒ අනුව මෙම නඩුව විභාග කිරීමට අනුරාධපුර දිසා අධිකරණයට බලයක් නොමැති බව කීය.
පෙත්සම්කරු වෙනුවෙන් අධිකරණයට කරුණු දක්වමින් ජ්‍යෙෂ්ඨ නීතිඥ හේ.බ. රත්නායක මහතා සඳහන් කළේ නඩුවට අදාළ විරෝධතා ඇත්නම් ඒ බව අධිකරණයට ප්‍රකාශ කළ යුත්තේ නඩුව විභාගයට ගැනීමට පෙර බවයි. එසේ නොමැතිව නඩුව විභාගයට ගෙන සාක්ෂි විමසීම් පවා සිදු කළ පසුව අධිකරණ බලය නොමැති බව පවසමින් විරෝධතා දැක්වීමෙන් පලක් නැති බවද නීතිඥවරයා කීය.
පෙත්සම්කරු වෙනුවෙන් අධිකරණයට කරුණු දක්වමින් ජ්‍යෙෂ්ඨ නීතිඥ හේ.බ. රත්නායක මහතා සිය මූලික කරුණු දැක්වීම්වලදී සඳහන් කළේ වන අලීන්ගෙන් කුඹුරු වගාවන්ට සිදු වන හානි සහ එල්ල වන තර්ජනවලින් මිදීම සඳහා වනජීවී දෙපාර්තමේන්තුවෙන් විදුලි වැටක් ඉදි කළ යුත්තේ ගල්කිරියාගම උදුරුව විරන්දාවටන හා හෝරාපොළ යන ගම්මාන යා කිරීමෙන් බවයි.
එහෙත් වනජීවී දෙපාර්තමේන්තුව මෙම විදුලි වැට ඉදි කර ඇත්තේ ගල්කිරියාගම උදුරුව දෙඹිවටන විරන්දාවටන මහවැලි කුඹුරු සහ තබණ්ඩාරපොන හා හෝරාපොළ යන ගම්මාන යා කරමින් බවද අධිකරණය හමුවේ පෙන්වා දුන්නේය.
අවිධිමත් ආකාරයෙන් ඉදිකර ඇති ප්‍රශ්නගත මෙම විදුලි වැට නිසා ප්‍රදේශයේ කුඹුරු වගාවන්ට වන අලීන්ගෙන් බරපතළ තර්ජනයක් එල්ල වී ඇති බවද නීතිඥවරයා කීය. වනජීවී දෙපාර්තමේන්තුව මෙම විදුලි වැට ඉදිකර ඇත්තේ විදුලි වැටක් විධිමත් ආකාරයෙන් නියමිත බිම් තුළ පමණක් ඉදි කළ යුතු ආකාරය දැක්වෙන රජයේ ගැසට් පත්‍රයේ සඳහන් නිර්ණායක මුළුමනින්ම උල්ලංඝනය කරමින් බවට ද නීතිඥවරයා චෝදනා කළේය.
මෙම ප්‍රදේශය වසරේ වැඩි කාලයක් වර්ෂාවෙන් තොර වියළි කාලගුණයක් පවතින බවත් වැව් ජලය උපයෝගි කර ගනිමින් වගාවන් සිදු කර ඇති බවත් දැනට ඉදිකර ඇති විදුලි වැට ආසන්නයේ ගොයම් සහිත විශාල බිම් ප්‍රමාණයක් පවතින බවත් අධිකරණයට සැලකළ ජ්‍යෙෂ්ඨ නීතිඥ රත්නායක මහතා එම කුඹුරු වගාවන්ට වන අලීන් පැමිණීම වළක්වාලීමට දැනට ඉදිකර ඇති විදුලි වැට ප්‍රමාණවත් නොවන බවද අවධාරණය කළේය.
මෙම පෙත්සම විභාගයට ගෙන අවිධිමත්ව ඉදිකර ඇති ප්‍රශ්නගත විදුලි වැට රජයේ ගැසට් පත්‍රයේ සඳහන් නියමයන් උල්ලංඝනය කරමින් ඉදි කර ඇති බවට තීන්දු කරන ලෙසද අධිකරණයෙන් ඉල්ලා සිටි නීතිඥවරයා දැනට ඉදිකර ඇති විදුලි වැට වෙනුවට රජයේ ගැසට් පත්‍රය ප්‍රකාරව නියමිත ගම් මායිම් හරහා විදුලි වැට ඉදි කරන ලෙසට වනජීවී අධ්‍යක්ෂ ජනරාල්වරයාට නියෝග කරන ලෙසත් අයැද සිටියේය.
පෙත්සම්කාර පාර්ශ්වය වෙනුවෙන් ජ්‍යෙෂ්ඨ නීතිඥ හේ.බ. රත්නායක මහතා සමඟ නීතිඥ හර්ෂණී ප්‍රේමසිරි මහත්මිය පෙනී සිටි අතර වගඋත්තරකරුවන් වෙනුවෙන් ජ්‍යෙෂ්ඨ නීතිඥ මාලනී රණේපුර මහත්මියගේ උපදෙස් මත රජයේ අධිනීතිඥ මොහිදීන් ෆායිෂ් මහතා පෙනී සිටියේය.
( දිනමිණ)
