ප්‍රජාවක් යනු මිනිසුන්ය. ඔබගේ අවශ්‍යතා වෙනුවෙන් හෝ වෙනත් අයගේ වුවමනාවන් හදුනා ගැනීම සදහා ප්‍රජාවේ එක් එක් අය සමග කතා කල හැකිය. එසේම ප්‍රජාවක් යනු පොදු දෙයක් බෙදා ගන්නා කොටසකි. ප්‍රජාවේ සිටින එක් එක් පුද්ගලයන් සමග කතා කිරීමට හැකියාවක් නැති නමුත් සියල්ලෝටම එක් වර කතා කිරීමට හැකිය.
වර්තමාන ශ්‍රී ලාංකික ප්‍රජාවන්ගේ ප්‍රධානතම ඇදහිල්ල වන්නේ දේශපාලනයයි. දේශපාලනය වන්දනා කරන ඔවුන්ගේ වීරයන් , නායකයන් සහ පූජකයන් වන්නේද එම දේශපාලන නායකයන් වේ. තමන්ගේ ආගමික නායකයන් උගන්වා තිබෙන බොහෝ දේ වෙනුවට තම දේශපාලන නායකයන් පතුරුවන දූෂණය, වංචාව සහ බොරුවේ අනුගාමිකයන් වන්නේ ඡන්ද දායකයාය. මේ චන්ද දායකයන්ගෙන් බහුතරයක් ඉල්ලන්නේ පාරවල්, ගොඩනැගිලි, රැකියා ආදී භෞතික දේ පමණි. කිසම දිනක ඔවුන්ගේ කායික සහ මානසිකව විදින වේදනා සදහා ප්‍රතිකාර ලබාදෙන ලෙස හෝ තම මව් බිමේ ආරක්ෂාව හෝ තම ආගම අරක්ෂාව ඉල්ලා සිටින්නේ නැත.
ප්‍රජාවක් තුල විවිද හවුල්, ගුණාංග, විවිද ශක්තීන් , විවිධ හැකියාවන් සිටින මිනිසුන් සිටිති. එසේම ප්‍රජාවෙන් ප්‍රජාවට ගුණාංග සහ ශක්තීන් විවිදයි. අප ශ්‍රී ලංකාවක් ලෙස ගත් විට විවිද ප්‍රජාවන් ගනණාවක් සිටිති. ආගමික වශයෙන් ගත් විට බෞද්ධ, ඉස්ලාම්, හින්දු කතෝලික වශයෙන්ද, ජාතීන් ලෙස ගත් විට සිංහල, දමිල, මුස්ලිම්, බර්ගර්, මැලේ ලෙස ප්‍රධාන ජාතීන්ද දැක ගත හැකිය. එසේම විවිධ රටවල් වලින් ශ්‍රමිකයන් ලෙස සංක්‍රමණය වූ ජපන්, චීන, ඉන්දීය, පකිස්තාන් ආදී ලෙස විවිධ ජාතීන් දැක ගත හැකිය. ජාතීන් ලෙස සහ ආගමිකයන් ලෙස ගත් විට මෙම ප්‍රජාවන් තුල විවිද වෙනස් කම් දැකිය හැකිය. ජාතීන් ලෙස සහ ආගමික ලබ්දිකයන් ලෙස ගත් විට ඒවායෙහි විවිද සංස්කෘතික ලක්ෂණ දැකිය හැකිය. එසේම දේශපාලනිකව ගත් විට වෙනත් රටවල් වලට වඩා දූෂිත අදහස්වලින් පිරුණු දේශපාලන පක්ෂ සමග බැදී ඒ මග යන ප්‍රජාවන් බහුල වශයෙන් දැක ගත හැකිය.
උදාහරණයක් ලෙස දමිල ජාතිකයන් ගත් විට ඔවුන් ජාතියක් ලෙස එකම සංස්කෘතියක් ඇති ප්‍රජාවකි. එහෙත් ආගමික ප්‍රජාවක් ලෙස ගත් හින්දු , බෞද්ධ සහ කතෝලික ලෙස ආගමික ප්‍රජාවන් තුනක්ම දමිල ජාතිකයන් තුලින් දැකිය හැකිය.
වෙනත් රටවල් තුල මෙන්ම ශ්‍රී ලංකික ප්‍රජාව තුල ද විවිධ අනන්‍යතාවයන් දැක ගත හැකිය. ඒවා විවිධය. වර්ගය, ආගම, හිතවත්කම, ආදිය තුලින්ද විවිද ප්‍රජාවන් දැක ගත හැකිය. විවිද නැටුම් කණ්ඩායම්, ක්‍රීඩා කණ්ඩායම්, හමුදාවන් ලෙසද ගත් විට ඒවා ද විවිද ප්‍රජාවන්ය. ඒවායේ ඇතුලතින් ගත් විට විවිද තනතුරු නිළ නාම ලෙසද ප්‍රජාවන් වෙන් කර ගත හැකිය. එසේම ශ්‍රී ලාංකික ලෙස ගත් විට අප සියල්ලෝම එකම ශ්‍රී ලාංකික ප්‍රජාවකි.
ශක්තිමත් ප්‍රජාවක් තුල එහි සාමාජිකයන් අතර සහයෝගීත්වයක් ඇති කරයි. ශක්තිමත් නිශ්චිත සමාජ සම්මතයන් ඉදිරියට ගෙන යයි. ඒවායෙහි හදුනාගත හැකි නායකයන් සිටිති. දුර්වල ප්‍රජාවන් විසිරි ගොස් ඇත. නායකයා යනු කවුරුන්දැයි සොයාගත නොහැකි ලෙස දුර්වල ප්‍රජාවන් විසිරි ගොස් ඇත. එහෙත් දුර්වල වුවත් නැතත් ප්‍රජාවන් පවතී. මේ වන විට ශ්‍රී ලංකාවේ ප්‍රජාවන් සෑම අතකින්ම දුර්වල වෙමින් පවතී. දේශපාලන ප්‍රජාවන් පවා දුර්වල වෙමින් පැවතුනද, එම ප්‍රජාවන් තුල සිටින නායකයන් ඔවුන්ගේ පෞද්ගලික තත්වයන් හොද පැත්තකින් හෝ නරක පැත්තකින් දියුණු කරගෙන තිබේ. වුවද ඔවුන් රටක නායකයන් ලෙස අසාර්ථක නායකයන්ය.
කෙසේ වුවද ශ්‍රී ලාංකික ප්‍රජාව සෑම අතකින්ම දුර්වල වී තිබේ. ශ්‍රී ලාංකික ප්‍රජාවේ දුර්වලත්වය හේතුවෙන් විවිද ප්‍රශ්න ගැටළු රාශියකට මුහුණ දෙමින් සිටිති. ශ්‍රී ලාංකික ප්‍රජාව මෙතරම් දුර්වල වීමට ප්‍රධානම හේතුව නම් රාජ්‍ය පාලනය සදහා නිසි නායකයන් සොයා ගැනීමට ප්‍රජාව අසමත් වීම. එසේ අසමත්වීමේ ප්‍රතිපලයක් ලෙස ශ්‍රී ලාංකික ආර්ථිකයත්, දේශපාලනයත්, සමාජයත්, පරිසරයත් විනාශ වෙමින් පවතී.
ඒ හේතුවෙන් සමස්ත පරිපාලනය තුලද විවිද උප සංස්කෘතීන් සමග සමාජය විනාශ කරන සමාජය තුල විවිධ ගැටළු ඇතිකරන කල්ලි බිහි වී තිබේ. එසේ විවිද කල්ලි බිහිව තිබෙන්නේ පරිපාලනයේ දුර්වලතා සහ ශ්‍රී ලාංකික ප්‍රජාවක් ලෙස දැක්මක් නොමැති නිසාය. ශ්‍රී ලාංකික ප්‍රජාවක් ලෙස මෙන්ම තම තමන්ට පුද්ගලිකවද ලෝකය පිළිගත් ඉදිරිගමනක් යාමට අවශ්‍ය දැක්මක් නැති අතර ඒ දැක්ම ස්ථාපනය කර නැත.
ශ්‍රී ලාංකික ප්‍රජාව කෙතරම් දුර්වලද යත්, කිසිදු රජයකට ඉදිරියට යාමට නොහැකි වී ඇත. විවිද කල්ලි සහ කණ්ඩායම් එකතුව විවිධ අයුරින් ජනතාවට පීඩා කරවමින් රජයන් අප්‍රසන්නතාවයට ලක් කරයි. විවිධ වෘත්තීය සමිති එක් එක්වද, විවිද වෘත්තීකයන් තනි තනිවද තම බලය භාවිතා කරමින්ද මෙසේ විවිධ ප්‍රජාවන් විසින් තවත් ප්‍රජාවන් පීඩාවට පත්කරමින් සිටිති. එවිට පීඩාවට පත්වන පුද්ගලයන් කණ්ඩායම් ලෙස එක්ව විවිද අයුරින් නව ප්‍රජා කණ්ඩායම් බිහිකර ගනිමින් සිටිති. එවිට ප්‍රබල කණ්ඩායම් වලට එරෙහිව තවත් ප්‍රබල සහ ප්‍රබල නොවන කණ්ඩායම් බිහි වෙමින් පාලනය අවුල් වියවුල් කරමින් සිටින්නේ අවුරුදු ගණනාවක සිටයි. ආගමික ප්‍රතිපත්තියට පයින් ගසා තම ආත්මාර්ථකාමී ඉලක්කයන් කරා වේගයෙන් දිව යන ප්‍රජාවන් හෝ එහි කොටස් මහජන සාමයට සිදු කරන්නේ බරපතල හානියකි.
පොලිසිය, හමුදාව, බුද්ධි අංශ, වෛද්‍යවරු, නීතිඥ, ව්‍යාපාරික, විනිශ්චයකරුවන්,පාරිසරික ආයතන, ආගමික ආයතන, ගොවි – කම්කරුවන්, දේශපාලකයන්, රියදුරන්, නළු නිලියන්, ගායකයන් ආදී සියලු ප්‍රජාවන් දූෂිත සහ විකෘති වී ඇත්තේ එකම රටක් ලෙස ඉදිරියට යාමට අවශ්‍ය දර්ශනයක් නොමැතිකම සහ රටට ආදරය නොකිරීම සහ තමන්ගේ හෙට දවසවත් හිතන්නට තරම් දැක්මක් නොමැතිකම නිසාය. සමහර වෘත්තීකයන් කෙතරම් නූගත්ද යත් සමාජයෙන් හෝ මිනිසුන්ගේ හෝ රටේ විනාශයෙන් ඔවුන්ට පලක් නැත. ඔවුන්ට වැටුප් ගෙවන මහජනතාවද ඔවුන්ට වැඩකට නැති උන්ය.
ඒ අතරම ශ්‍රී ලාංකික ඉතිහාසය විනාශ කරන තවත් කණ්ඩායම් සහ ප්‍රජාවන්ද, නීති විරෝදී ක්‍රියාවන් සිදු කිරීමටත් ඒවායින් ඔවුන්ව බේරා ගැනීමටත් අවශ්‍ය තවත් කණ්ඩායම් ද , ඇතුළුව විවිධ මාෆියා කල්ලිද ප්‍රජාවන් සේ ක්‍රියාත්මක වෙමින් සිටිති. ඒ අතර අල්ලස් ලබා දී හෝ තම අවශ්‍යතා ටූ කරගැනීමට ඔවුන් පෙළඹී සිටින අතර අල්ලස් හෝ සන්තෝසම් මුදලක් ලබා නොදෙන අයට තම රාජකාරිය හෝ යුතුකම ඉටු කර නොදී සිටින පුද්ගලයන් සහ කල්ලි සහ කණ්ඩායම්ද සිටිති. ඔවුන් බොහෝ විට නීතිවිරෝදී මංකොල්ලකරුවන් වැනිය. රට තුල තිබෙන දේශීය දේ පවා අගය නොකරන තරමට ශ්‍රී ලාංකිකයන් පරගැති වහලුන් වී තිබේ. මේ තත්වයෙන් ශ්‍රී ලංකාව මුදවා ගැනීමට නම් මේ සියලු මාෆියා කල්ලි වලට එරෙහි වීමෙන් පලක් නැත. ඒ සදහා කල යුත්තේ විදිමත් ලෙස ජනතාවගේ කායික සහ මානසික ශක්තීන් ප්‍රවර්ධනය කරමින් පෞරුෂත්වයෙන් පිරි පරපුරක් නිර්මාණය කිරීමේ කටයුත්ත සිදු කිරීමයි. ඒ සදහාද උගතුන් ශ්‍රී ලංකාවේ සිටින්නේ ද අතලොස්සකි.
මේ වන විට ශ්‍රී ලංකාවක් ලෙස ගත් විට, ඔබත් මාත් දැක්මක් නැති විසිරි ගිය ශ්‍රී ලාංකික ප්‍රජාවේ සාමාජිකයන්ය. එයට හේතු ලෙස දේශපාලනමය, වෘත්තීමය, ආර්ථිකමය, සමාජමය සහ පාරිසරික වශයෙන් පිළිගත් කිසිදු සිද්ධාන්තයක් මානව හිතවාදී පැවැත්මක් සදහා ස්ථාපනය කිරීමට අපොහොසත් වීමයි. උදාහරණයක් ලෙස, වෛද්‍යවරුන්ගේ විද්‍යාත්මක දැක්ම ඔවුන්ගෙන් බොහෝ දෙනෙකු නොදනී. ඔවුන් වෙලදුන්ය. ගුරුවරුන්ගෙන් බහුතරයද එසේමය. ඔවුන්ද වෙලදුන්ය. පූජක පක්ෂයද එසේමය. ඒ ආදී ලෙස ගත විට සියලුම රාජ්‍ය නිලදාරීන් තමන්ගේ වගකීමෙන් බැහැරව කටයුතු කරති. එබැවින් ඔබගේ පක්ෂය , ආගම, කුලය, ජාතිය, වෘත්තිය, තරාතිරම, ඔබට ඇති බලය ආදී කුමක් වුවද ඔබ සියලු දෙනාම ශ්‍රී ලාංකිකයන් ලෙස විසිරි ගිය දුර්වල ප්‍රජාවක් සහිත රාජ්‍යක උරුමක්කරුවන් බව අමතක නොකරන්න. එබැවින් තම යුතුකම නිසි ලෙස මාතෘ භූමියේ සුරක්ෂිභාවයත් , අනාගත පරපුරට සුපසන් දේශයක් ගොඩනැගීමත් වෙනුවෙන් මේ සියලු බෙදීම් පසෙක ලා අනාගත පරපුර වෙනුවෙන් පෙළගැසිය යුතුව ඇත. ඔබට ශ්‍රී ලංකාවක් අවශ්‍යද?. නිදහස් නිවහල් දේශයක් අවශ්‍යද?. ඔබේ දරු පැටවුන් වෙනුවෙන් ලෝකයක් අවශ්‍ය බව ඔබ සිතන්නේද?. එසේනම් ඔබ ප්‍රථමව ඔබේ දේශපාලන බැමි ලිහා දමන්න.
