පාසල් ප්‍රජාවට අපිරිසිදු ජලය පානය කිරීමට සිදු වෙලා.
සෞඛ්‍ය අමාත්‍යාංශය විදුලි බිල ගෙවලා නෑ.
ජල පෙරනයත් අනතුරේ.
විදුලිය නොකපන ලෙස ප්‍රාදේශීය ලේකම් ලිඛිතව ඉල්ල ලා.
කලාප අධ්‍යාපන අධ්‍යක්ෂකටත් දරු දුක දැනී නෑ.
ඇඹිලිපිටිය පදලංගල ජයන්ති විද්‍යාලයේ දරුවන් වකුගඩු රෝගයෙන් බේරාගැනීම වෙනුවෙන් සෞඛ්‍ය අමාත්‍යාංශය විසින් සවි කර තිබෙන ප්‍රති ආශ‍්‍රැතිකරණ ජල පෙරණ පද්ධතියට සවි කර තිබෙන විදුලි සැපයුම විදුලිබල මණ්ඩලය විසින් විසන්ධි කර තිබේ.
එයට හේතුව වන්නේ සෞඛ්‍ය අමාත්‍යාංශය විසින් ගෙවිය යුතු විදුලි බිල ගෙවා නැති වීමයි. එහි වර්තමාන විදුලි බිල 123000 ක් පමණ වේ.
සෞඛ්‍ය අමාත්‍යාංශය විසින් මුදල් ලැබුණු පසු මුදල් ගෙවන තෙක් එම විදුලි සැපයුමේ විදුලිය විසන්ධි නොකරන ලෙස ඇඹිලිපිටිය ප්‍රාදේශීය ලේකම්වරයා විසින් ඇඹිලිපිටිය විදුලි ඉංජිනේරුගෙන් ලිඛිත ඉල්ලීමක් ද කර තිබේ.
එසේ ඉල්ලීමක් කර තිබුණත් විදුලිබල මණ්ඩලයේ ඇඹිලිපිටිය විදුලි ඉංජිනේරුවරයා විසින් මෙම ජල සැපයුම ක්‍රියාත්මක කිරීම අක්‍රීය වන ලෙස විදුලි බලය විසන්ධි කර තිබේ. ඔහු ප්‍රකාශ කරනුයේ එම බිල ගෙවීමට කිසිවෙක් කටයුතු නොකරනා බවයි.
එවකට සෞඛ්‍ය ඇමති කෙහෙලිය 2023 ජුලි 27 ප්‍රකාශ කලේ සෞඛ්‍ය අමාත්‍යාංශයට අයත් ආයතනවල විදුලි බිල් ගෙවීමට එකඟතාවයක් ඇති කරගත් බවයි.
එසේ වුයේ නම් මෙසේ වුයේ කෙසේද? යන්න වර්තමාන සෞඛ්‍ය ඇමතිගෙන් අප ප්‍රශ්න කරන්නෙමු .
රත්නපුර දිස්ත්‍රික් මන්ත්‍රීවරයෙකුගේ නිවසේ නොගෙවා ඇති විදුලි බිල ලක්ෂ 13 ක් බව මීට පෙර වාර්තා කළේය.
අමාත්‍ය කෙහෙළිය රඹුක්වැල්ල නොගෙවා තිබු විදුලි බිල කෝටිය පැන්නේය. නාමල් රාජපක්ෂගේද එසේය. නමුත් ඔවුන්ගේ විසන්ධි නොවූ විදුලිය, වෙනුවට පාසල දරුවන්ගේ ජල කරාමයේ විදුලිය විසන්ධි විය.
මෙවැනි සිද්ධීන් වන විට ඒවා සෙවීමට ඇඹිලිපිටිය කලාප අධ්‍යාපන අධ්‍යක්ෂකටද වගකීමක් තිබේ. විදුලිය නොමැති වූ විට ජලය පෙරීම අක්‍රීය වේ. එසේ අක්‍රීය වූ විටද විනාශ වන්නේ මහජන මුදල් ය. විදුලි මණ්ඩලයේ සේවකයන්ද අනෙකුත් රාජ්‍ය සේවකයන්ට වඩා ඉහල වැටුපක් ලබා ගනී.
අනෙක් ඒවා කෙසේ වෙතත් මේවා රාජ්‍ය ආයතන වේ. කලාප ආධ්‍යාපන අධ්‍යක්ෂක ගුරුවරුන්ගේ රැස්වීම්වලදී ප්‍රකාශ කරන්නේ මාධ්‍ය මගින් තමන්ගේ නම ප්‍රසිද්ධ වීම හොද බවයි. කලාප අධ්‍යාපන අධ්‍යක්ෂක කුමන ආකාරයෙන් පම්පෝරි ගැසුවත්, මෙසේ පිරිසිදු ජලය ලැබීම අක්‍රීය කර තිබෙන්නේ ඔබේ කලාපයේ දරුවන්ගේ පාසලකය. සෞඛ්‍ය අමාත්‍යාංශය මගින් එය එහි සවිකර තිබෙන්නේ දරුවන්ට යම් සෞඛ්‍ය ගැටළුවක් තිබෙන බැවිනි.
ඒ අනුව අපට පෙනෙන්නේ සෞඛ්‍ය බලධාරීන්ටත්, විදුලි ඉංජිනේරුවරුන්ටත්, ඇඹිලිපිටිය කලාප අධ්‍යාපන අධ්‍යක්ෂකටද දරු දුක නොදැනෙන බවය. එසේ දැනෙන්නේ නම් මේවා මෙසේ විය නොහැක. එසේ නොදැනෙන මිනිසුන්ගෙන් මෙන්ම රාජ්‍ය බලධාරින්ගෙන්ද රටට අවශ්‍ය නිසි සේවය නොලැබේ.මෙරට මෙසේ විනාශ වුයේද එනිසාමය.
විදුලි බල හා බලශක්ති අමාත්‍ය කාංචන විජේසේකරටද මේවා සොයා බැලීමට වඩා කිරීමට වෙනත් බොහෝ දේ තිබේ. මේවා රාජ්‍ය ආයතන නම් කල යුත්තේ කුඩා දෙයකි. කුමන අයුරින් වුවත් අඩු වන්නේ දේශීය රාජ්‍ය අදායම පමණි. දරුවන්ට ජලය ලබා දෙන්නේ මෙම ප්‍රදේශයේ ගැටළුවක් තිබෙන තිබෙන බැවිනි.
මෙවැනි දෙයක්වත් කල යුතු බවට සෞඛ්‍ය අමාත්‍යංශ බලධාරීන්ද දැනීම ඉතා හොදය. නමුත් මේවායේ ඉදිරි සැලසුම් ක්‍රියාත්මක නොකර, සවි කිරීමෙන්, සෞඛ්‍ය අමාත්‍යංශයේ මේවා මිලදී ගත් නිලධාරීන් කොපමණ මුදලක් අත අයට ගසා ගත්තේද යන්න අප නොදනී. නිසි ලෙස සියල්ල ඉටුකළේ නම් මෙසේ බිල් නොගෙවීම නිසා දරුවන් අපහසුතාවයට ලක් වන්නේ නැත.
මෙසේ අහිමිකර තිබෙන්නේ දරුවන්ගේ පිපාසය සන්සිදවීමේ මාර්ගයක් බවත්, විදුලිය විසන්ධි කිරීමට ඔවුන්ටද නොදැනීමෙන් පෙනී යන්නේ, විදුලි ඉංජිනේරුවන් වලව මිටියාවතේ ප්‍රජාවගෙන් පලිගන්නා බවයි.
මෙම ප්‍රදේශය තුල ජනතාව ජීවත් වන්නේ කෘෂිකාර්මික කටයුතු වලිනි. පසු ගිය දැඩි නියඟයෙන් ද ඔවුන් පිීඩා වින්දේය. ජලය ලබා දෙන ලෙස සමනල වැවේ උද්ඝෝෂණය කලේද මෙම ප්‍රදේශයේ වැඩිහිටියන්ය. සමනල වැවේදී ඔවුන් ප්‍රකාශ කලේ විදුලි ඉංජිනේරුවරුන්ගේ නිවෙස් වටකරනා බවයි.
අමාත්‍යවරයාගේ නිවස වැටලීමට සාකච්චා පැවැත්විණි. සෞඛ්‍ය අමාත්‍යාංශය විසින් ජල පෙරණයක් සවි කිරීම පැසසිය යුතු අතර රජයේම තවත් ආයතනයක් වන විදුලිබල මණ්ඩලය විසින් මේ ආකාරයෙන් දරුවන් වෙත පිරිසිදු ජලය ලබා දිය යුතු එම විදුලිය විසන්ධි කිරීම පිළිබඳව රාවණා ලංකා අප, විදුලිබල මණ්ඩලයටත් විදුලිබල අමාත්‍යවරයා වෙතත්, ඉදිරි කටයුතු සිදුනොකළ සෞඛ්‍ය අමාත්‍යාංශයටත් දැඩි අප්‍රසාධය පළ කරන්නෙමු.
විදුලිබල මණ්ඩලයෙහි සේවකයන් දැනගත යුතු ප්‍රධානතම කරුණ නම් ඔබ මෙරට මහජනතාවගෙන් වැටුප් ලබන්නෝය. ඔබ මෙරට මහජනතාවගෙන් විශාල වැටුපක් ලබයි.එවැනි විශාල වැටුපක් ලබා ගන්නා ඔබ ඔබට වැටුප් ගෙවන ජනතාවගේ දරුවන්ගේ සුබසිද්ධියට විරුද්ධව මේ ආකාරයෙන් කටයුතු කිරීම පිටුපස ඇත්තේ ඔබ මානුෂීය නොවන බව නැවත නැවතත් පෙන්වා දීමය. අරගලය සමයේ මහා වැව් වල ජලය නිරපරාදේ මුදා හරියේද ඔබය. නොසිදෙන වැව්වල ජලය නිරපරාදේ මුදා හරින ඔබලාම පෞද්ගලික අංශයෙන් විදුලිය ලබා ගන්නා බවත්, ඒ වෙනුවෙන් ඔවුන්ගෙන් විදුලි ඉංජිනේරුවරුන්ට කොමිස් ලැබෙන බවද නොරහසකි.
පුංචි උන්ගෙනුත් පලිගන්නා හෝ විදුලිය විසන්දි කිරීම නිසා පොඩි උන් පානය කරන්නේ අපිරිසුදු ජලය නේද යන්න සිතන්නටවත් සාමාන්‍ය දැනුමක් නැති, මෙසේ දිගින් දිගටම බිල නොගෙවීම නිසා ඒ පිළිබදව කරුණු වාර්තා කර ඒවාට විසදුම් දිය නොහැකි ලංකා විදුලි බල මණ්ඩලයේ උසස් නිලධාරීන්ගේ සාමාන්‍ය දැනීමක් නැති බැවින් අපට පෙනෙන්නේ ජනවාරි මාසය වීමටත් පෙර, වැව් වල ජලය අවසන් බවට නිවේදනය කරනු ඇති බවයි.
එවන් රටක, පුංචි උන් ගැනවත් නොසිතනා රාජ්‍ය බලධාරීන් සිටිනා රටක මේවා මෙසේවත් ඉතිරිව තිබීම ගැන සතුටු විය යුත්තේ මෙරට චන්ද දායක මහජනතාවමය. මේවා සියල්ලම ඔවුන්ගේ නිර්මාණයන් ය.
