තංගල්ල මහේස්ත්‍රාත් අධිකරණයේ විභාගවන මිනිස් ඝාතන නඩුවකට පෙනීසිටීමට යමින් සිටි අපේ ජනබල පක්ෂයේ නායක සමන් පෙරේරා නොහොත් රෝයල් බීජ් සමන් ඇතුළු පස්දෙනකු ඝාතනය කරමින් දක්ෂිණ අධිවේගී මාර්ගයේ බෙලිඅත්ත පිවිසුම ආසන්නයේදී පෙරේදා (21) උදෑසන එල්ලවුණු වෙඩි ප්‍රහාරය සම්බන්ධීකරණය කළ බව කියන පුද්ගලයාව හඳුනාගෙන කොටුකර ගැනීමට පොලිසිය සමත්ව ඇත.
වෙඩික්කරුවන් පැමිණි ජිප් රථයද මේ වනවිට පරිහරණය කරන පුද්ගලයා කවුරුන්ද යන්නද හඳුනාගැනීමට හැකියාව ලැබී තිබේ. ජිප් රථය ඊයේ සවස් වන විටත් කඹුරුපිටිය ප්‍රදේශය ආශ්‍රිතව යම් ස්ථානයක නතර කර තිබී ඇත.
එම ජිප් රථය සමඟ මෙම ප්‍රහාරය සම්බන්ධීකරණය කරන ලද පුද්ගලයාව අත්අඩංගුවට ගැනීමට විශේෂ පොලිස් මෙහෙයුමක් ඊයේ රාත්‍රියේ දියත් කර තිබිණි
මෙම ප්‍රහාරයට හමුදාවට සම්බන්ධ අයෙක්ද පැමිණ ඇති බව මේ වන විටත් තහවුරු වී ඇත. එම පුද්ගලයාව අද හෙටම අත්අඩංගුවට ගැනීමට හැකි වෙතැයි පොලිසිය විශ්වාස කරයි.
මෙම ප්‍රහාරය සම්බන්ධීකරණය කරන ලද පුද්ගලයා විවිධ අපරාධවලට සම්බන්ධ අයෙකි. වසර හය හතක්ම ඔහු බන්ධනාගාරගතව සිටි අයෙක් බවද සඳහන්ය.
බෙලිඅත්තේ සිදුවූ මෙම පංච පුද්ගල ඝාතනය සම්බන්ධයෙන් බොහෝ තොරතුරු මෙම ප්‍රහාරය සම්බන්ධීකරණය කරන ලද සැකකරුගෙන් අද වන විට අනාවරණය කර ගැනීමට හැකි වෙතැයි පොලිසිය විශ්වාස කරයි.
ඒ අනුව, මෙම ප්‍රහාරයට සම්බන්ධ සෙසු සැකකරුවන් හඳුනාගෙන අත්අඩංගුවට ගැනීමට හැකිවනු ඇතැයි පොලිසිය අපේක්ෂා කරයි.
ජීප් රියෙන් බැස සැකකරු පාසල් සිසුන් භාවිත කරනු ලබන කළු පැහැති බෑගයක් කරේ එල්ලාගෙන මුව ආවරණයක්ද එම අවස්ථාවේ දී පැළද සිට ඇත.
සාමාන්‍ය ඇඳුමකින් සැරසී සිටි ඔහු වැඩි කලබලයකින් තොරව ජිප් රථයෙන් බැස මාර්ගය දිගේ ඇවිදගෙන ගොස් මාතර බලා යන මගී බස් රථයකට ගොඩවී තිබේ. ඒ අතර ජිප් රථය කඹුරුපිටිය නගරය පසුකර ගමන්කර ඇත.
මෙම කරුණු හෙළිවී ඇත්තේ වෙඩික්කරුවන් ගමන් කළ ජිප් රථය පළාගිය මඟ දෙපස වෙළඳ සැල් හා නිවාසවල ඇති ආරක්ෂක කැමරා රැසක් පරීක්ෂාකරමින් කළ විමර්ශනයකදීය.
මාතර බස් රථයට ගොඩවුණු වෙඩික්කරු බස් රථයෙන් බසින ලද්දේ කුමන ප්‍රදේශයකදීදැයි සොයා ද මේ වන විට විමර්ශනයක් ආරම්භ කර ඇති අතර ජිප් රථයේ ගමන් මඟද මේ වන විට ආරක්ෂක කැමරා 100කට වැඩි සංඛ්‍යාවක් පිරිස්සමින් සොයාබලමින් සිටින බව උසස් පොලිස් නිලධාරියෙක් සඳහන් කළේය.
වෙඩික්කරුවන් ගමන් ගත් මෙම ජිප් රථය වෙඩි ප්‍රහාරයෙන් පසු පළාගියේ කඹුරුපිටිය නගරය ඔස්සේ මෙන්ම රථය මෙම ප්‍රහාරයට සූදානමින් වෙඩික්කරුවන්ද රැගෙන පැමිණ ඇත්තේ කඹුරුපිටිය දෙස සිට බව පෙනීගොස් තිබේ.
විමර්ශනයේදී පෙනීගොස් ඇති අකාරයට අනුව වෙඩික්කරුවන් පැමිණි ජිප් රථයයේ සිටි වෙඩික්කරුවන් සිය ඉලක්කය ලබාගැනීමට අධිවේගී මාර්ගයේ අන්තර් හුවමාරුව ආසන්නයේ බොහෝ වේලාවක් තිස්සේ රැඳී සිට ඇත.
සමන් පෙරේරා ඇතුළු පිරිස අධිවේගී මාර්ගය ඔස්සේ පැමිණෙන විට වෙඩික්කරුවන්ට කල්තියා තොරතුරු ලැබී ඇති බව විශ්වාස කරන විමර්ශන නිලධාරීන් එසේ අපරාධකරුවන් අතර තොරතුරු හුවමාරුවීම් සිදුවී තිබේදැයි තහවුරුකර ගැනීමට දුරකථන ජාල පරීක්ෂාවක්ද මේ වන විට සිදුකරමින් පවතී. එසේම වෙඩික්කරුවන් රැගත් ජිප් රථය ගමන්කළ මාර්ග මේ වන විට හඳුනාගෙන සිටින බැවින් දුරකථන ජාල විමර්ශනයට එය මහත් පහසුවක් වී ඇති බව ද පොලිස් තොරතුරු සඳහන් කළේය. හඳුනාගෙන ඇති ආකාරයට අනුව වෙඩික්කරුවන් පැමිණි වාහනයේ සටහන්ව තිබී ඇත්තේ 65-2615 අංකයයි. එම අංකය එම වාහනයේ සැබෑ අංකය නොවන බවත් වෙනත් වාහනයක අංකයක් බවත් විමර්ශනයේදී අනාවරණය වී තිබේ.
ආරක්ෂක කැමරා මගින් හඳුනාගත් කඹුරුපිටියෙන් බැස මාතර බස් රථයට ගොඩ වූ පුද්ගලයාගේ රුව කඹුරුපිටිය නගරයේ ඇති ආරක්ෂක කැමරා කිහිපයකම සටහන්ව තිබී ඇත. ඒ ඔස්සේ ඔහුගේ මුහුණේ තරමක් පැහැදිලි ඡායාරූපයක්ද මතුකර ගැනීමට හැකියාව ලැබී ඇත. එම ඡායාරූපය ගුවන්තොටුපල ස්වයංක්‍රීය මුහුණු හඳුනා ගැනීමේ පද්ධතිය (AFRS) වෙත මේ වන විටත් යොමුකර ඇති බව පොලිස් තොරතුරු සඳහන් කළේය.
මෙම පස් පුද්ගල ඝාතනය මෙහෙයවා ඇත්තේ ඩුබායි හි රැඳී සිටින ප්‍රබල පාතාලයේ අපරාධකරුවෙක් මෙන්ම මත්කුඩු ජාවාරම්කරුවෙක් වන කොස්ගොඩ සුජී නමැති අය බවට තොරතුරු මේ වන විට පොලිසිය හඳුනාගෙන ඇත. කුලී ඝාතකයන් පිරිසක් යොදා ඔහු මෙම වෙඩි ප්‍රහාරය එල්ලකර ඇති බව පෙනීයන්නේ යැයි විමර්ශන භාර උසස් නිලධාරියෙක් සඳහන් කළේය. කොස්ගොඩ සුජීගේ කුලී ඝාතකයන් අතර හමුදාවලින් පළාගිය පිරිස්ද එල්.ටී.ටී.ඊ.යේ හිටපු වෙඩික්කරුවන්ද සිටින බව එම නිලධාරියා කීය. මෙම ප්‍රහාරය එල්ලකර ඇත්තේ මනාවට ගිනි අවි පුහුණුව ලැබූවෙක් බව පෙනීයන බව ද එම නිලධාරියා වැඩිදුරටත් පැවසුවේය.
ඝාතනය වූ සමන් පෙරේරාට එරෙහිව ඝාතන චෝදනා ඇති බවත්, 2004 වර්ෂයේදී කොස්ගොඩ පොලිස් වසමේ දී කොස්ගොඩ සුජීගේ මාමා සහ සහෝදරයා ඝාතනය කිරීම සම්බන්ධයෙන් ඔහුට චෝදනා එල්ලවී ඇති බවත් පොලිසිය කියයි. 2016 වර්ෂයේදී ගාල්ල පොලිස් වසමේ දී සුජීගේ ඥාතියකු ඝාතනය කිරීම සම්බන්ධයෙන්ද සමන් පෙරේරාට චෝදනා එල්ලවී තිබී ඇත.
සමන් පෙරේරා ඉලක්කරගෙන කොස්ගොඩ සුජී විසින් 2018 වර්ෂයේ දී ඉදුරුව ප්‍රදේශයේ දී ඔහු ගමන්කරමින් සිටි වාහනයට වෙඩි තබා තිබේ. එහි දී ඔහු සමඟ සිටි විදේශකයකු බරපතළ තුවාල ලබා තිබිණි.
කොස්ගොඩ සුජී සහ සමන් පෙරේරා අතර දීර්ඝ කාලයක් තිස්සේ පැවැති ආරවුලක ප්‍රතිඵලයක් නිසා බෙලිඅත්තේ ප්‍රහාරය සිදුව ඇති බව පෙනී ගොස් තිබේ.
මේ අතර ඝාතනය වූ පස්දෙනාගේ පස්චාත් මරණ පරීක්ෂණ කටයුතු තංගල්ල රෝහලේ දී ඊයේ සවස සිදු කරන ලදී.
රථයේ රියදුරා ලෙස කටයුතු කළ රාජපක්ෂ නමැති අයගේ බෙල්ල ප්‍රදේශයට වෙඩි වැදීමෙන් ඇතිවූ තුවාලයක් හේතුවෙන් අභ්‍යන්තර ලේ වහනය නිසා ඔහුගේ මරණය සිදුවී ඇති බවත්, සෙසු සිවු දෙනාගේ මරණ සිදුව ඇත්තේ හිසට වෙඩි වැදීමෙන් මොළයට සිදුවූ හානි හේතුවෙන් බවත්, තංගල්ල රෝහලේ සිදුකළ පශ්චාත් මරණ පරීක්ෂණයේ දී අනාවරණය වී තිබේ.(දිනමිණ)
