මේ වන විට රට රට පුරා නැවතත් අලුතින්ම ඇතිව තිබෙන සංවාදය වන්නේ 13 වැනි ව්‍යවස්ථා සංශෝධනය බලාත්මක කිරීම පිලිබදවයි. එම ව්‍යවස්ථාවට අනුව ස්වයන් පාලන බලතල දීමෙන් සිදුවන්නේ ජාතීන් තුනම නැවත යුද්ධයකට මෙන්ම විවිධ ගැටුම්වලට මුහුනදෙන වාතාවරණයක් නිර්මාණය කිරීමයි.
කෙසේ නමුත් ඔක්තෝබර් 6 සහ 7 දෙදින තුළ පාර්ලිමේන්තුවට ගෙන ඒමට නියමිත 22 වන ව්‍යවස්ථා සංශෝධනයට මුවා වී 13 වන ව්‍යවස්ථා සංශෝධනය සම්පූර්ණයෙන්ම බලාත්මක කිරීමේ කූට ක්‍රියාවක් සිදුකරන බවද උගතුන් සදහන් කරයි. එයට එරෙහිව මහාචාර්ය පූජ්‍ය ඉඳුරාගාරේ ධම්මරතන හිමිගේ මෙහෙයවීම යටතේ, පූජ්‍ය හෑගොඩ විපස්සී සහ පූජ්‍ය මැඩිල්ලේ පඤ්ඤාලෝක හිමිගේ දායකත්වයෙන් ජාතික සංවිධාන 26ක නියමුවන්ගේ සහභාගිත්වයෙන් කොළඹ 7 නිදහස් චතුරස්‍රයේ දී අද (05) සත්‍යක්‍රියාවක් පවත්වන ලදී.
එම සත්‍යග්‍රහයේදී පහත සදහන්වන ලෙස සිදුකරන ලදී.
”සම්බුද්ධ ශාසනයේ ආනුභාවයෙන්, දන්ත ධාතූන්වහසේගේ ආනුභාවයෙන්, ශ්‍රී මහා බෝධීන් වහන්සේගේ ආනුභාවයෙන්,
1. අධිකරණයේ දී නීතිපතිවරයා විසින් එකඟ වන සංශෝධන සහ දේශපාලන පක්ෂ විසින් ඉදිරිපත් කරන ලද සංශෝධන අතුරින් ආණ්ඩුව එකඟවන සංශෝධන සියල්ල නිෂ්චිත වගන්ති ලෙස භාෂා ත්‍රිත්වයෙන්ම පාර්ලිමේන්තු මන්ත්‍රීවරුන් සහ මහජනයා වෙත වහාම ප්‍රකාශයට පත්කිරීම.
2 .දේශපාලන පක්ෂ විසින් ඉදිරිපත් කරන යෝජනා කුමණ පක්ෂ විසින් ඉදිරිපත් කළේද යන්න මහජනයාට අනාවරණය කිරීම.
3. එසේ කාරක සභා අවස්ථාවේ දී කෙටුම්පතට ඇතුළු කරන බවට ප්‍රකාශයට පත් කළ සංශෝධන හැර වෙනත් කිසිදු සංශෝධනයක් විශේෂයෙන්ම 154 වගන්තියේ අඩංගු ව්‍යවස්ථාමය බාධක ඉවත් කිරීම සඳහා වන වගන්ති කෙටුම්පතට ඇතුළු නොකරන බවට උපදේශ කාරක සභාවේ දී සහ කතානායකවරයා, අගමැතිවරයා සහ සභානායකවරයාගෙන් සහතිකයක් ලබා ගැනීම.
4. එවැනි සහතිකයක් ලබා නොදෙන තත්වයක් යටතේ විවාදය සහ ඡන්දය වර්ජනය කිරීම මගින් ව්‍යවස්ථා සංශෝධනය මගින් සිදුකෙරෙන ඒ මහා ඓතිහාසික පාපකර්මයට දායක නොවී සිටීම සඳහා පාර්ලිමේන්තු මන්තරීයව වරුන්ට ශක්තිය හා ධෛර්ය ලැබේවා.” යනුවෙන් සත්‍යක්‍රියා කරනු ලැබූහ.
මහාචාර්ය පූජ්‍ය ඉඳුරාගාරේ ධම්මරතන හිමියෝ සත්‍යක්‍රියාව ආරම්භ කිරීමට පෙර රැස්ව සිටි පිරිස අමතා අනුශාසනාවක්ද කරන ලදී. උන් වහන්සේ සදහන් කලේ ,
“බෞද්ධ භික්ෂූන්වහන්සේලා හැටියටත් ජාතික සංවිධානවල නියමුවන් හැටියටත් ගෞතම බුදුන්වහන්සේ විසින් ස්ථාපිත කරන ලද්දා වූ ශ්‍රී ලංකා සම්බුද්ධ ශාසනයේ චිරස්ථිතිය උදෙසා ජාතියේ ආරක්ෂාව සහ දේශයේ සුරක්ෂිතතාවය අරමුණු කරගනිමින් සත්‍යක්‍රියාවක් ආරම්භ කිරීමටයි සූදානම.
ඉහත කී කාරණා සම්බන්ධයෙන් තර්ජනාත්මක ස්වභාවයක් විශේෂයෙන්ම ව්‍යවස්ථාමය තර්ජනයක් එල්ල වී තිබෙන බව බෞද්ධයන් හැටියට අපට මේ වන විට වැටහිලා තිබෙනවා. ඒ අනුව දේශයේ ඒකීයභාවය ආරක්ෂාකර ගැනීම උදෙසාත් ජාතිය විවිධ වර්ණයන්ගෙන් හා පක්ෂයන්ගෙන් බෙදී නොයා එකතැනකට පැමිණ ජාතිය මුහුණ දී තිබෙන මේ අර්බූදයට මේ ගැටලූවට විසඳුමක් සෙවිය යුතුය යන කරුණ මත අද දවසේ අප මේ ස්ථානයට ඒකාරාශී වී තිබෙනවා.
මේ දක්වා සිදුව ඇත්තේ ආණ්ඩුකරන කරන උදවිය ව්‍යවස්ථාවට විවිධ සංශෝධන ලෙස පැලැස්තර ඉදිරිපත් කරමින් පියවරෙන් පියවර සිදුකර ඇත්තේ ජාතිකබලය දුර්වල කර රට විවිධ ආකාරයට බෙදා වෙන්කර ශ්‍රී ලංකාවේ නැගෙනහිර සහ උතුර එකට එකතු කර තවත් රටක් නිර්මාණය කිරීම උදෙසා බෙදුම්වාදීන්ගේ අදහස් සඳහා සැනසිල්ලට හේතු වන ආණ්ඩුක්‍රම ව්‍යවස්ථා සංශෝධන ඉදිරිපත් කිරීම පමණයි.
ඒ අනුව පාර්ලිමේන්තුවට ඉදිරිපත් කිරීමට යෝජිත 22 වන ව්‍යවස්ථා සංශෝධනය මගින් 13 වන ව්‍යවස්ථා සංශෝධනය පූර්ණ වශයෙන් බලාත්මක කිරීමේ පසුබිම සකස් කරාවි යැයි කියන සැකය දැඩිව අප සතුව තිබෙනවා.
ඒ වගේම මේතාක් පාර්ලිමේන්තුවට ඉදිරිපත් කළ ආණ්ඩුක්‍රම ව්‍යවස්ථා සංශෝධනවලට කාරක සභා අවස්ථාවේ දී කූට ලෙස සංශෝධන ඉදිරිපත් කරල එම සංශෝධන පනත් වල මූලික හරය සම්පූර්ණයෙන්ම වෙනස් කළ අවස්ථා සම්බන්ධව අත්දැකීම් අපට තිබෙනවා. ඒ අනුව 22 වන ව්‍යවස්ථා සංශෝධනයේ කාරක සභා අවස්ථාවේදී බෙදුම්වාදී උවමනා ඉෂ්ට වෙන සංශෝධන ඉදිරිපත් වේවිය යන සැකය අප තුළ තිබෙනවා.
13 වන ව්‍යවස්ථා සංශෝධනය බලාත්මක කරදී රට දෙකඩ කර ඉන්දියාවේ 29 වන සහ 30 වන ප්‍රාන්ත බවට පත්කරලීමේ ඉන්දියානු අධිරාජ්‍යවාදීන්ගේ උවමනාව ඉටුකිරීමට කටයුතු කරමින් සිටින බව අපට වැටහී යන නිසා අප ඊට එරෙහිව ජාතික සංවිධාන ලෙස නැගීසිටිනවා.
අද මේ අවස්ථාවට මහා සංඝරත්නය සමඟ එක්ව පෙළ ගැසෙන මේ ජාතික සංවිධානවල සියලූදෙනාම ශ්‍රී ලංකාවේ ඒකීය භාවය උදෙසා භෞමික අඛන්ඩතාවය උදෙසා දිවිහිමියෙන් හඬ නගන බව ජාතියට දන්වා සිටිනවා. අපි සියලූ දෙනාම රට දෙකඩ කරලීමේ කූට උපකරජාතමය පරාජය කළයුතු බව සපථ කරසිටිනවා.
ඒ වගේම මහා සංඝරත්නය ප්‍රමුඛ අප සියලූ දෙනාම පක්ෂනායකයින්ගෙන් දේශපාලන බලධාරින්ගෙන් දැඩිව ඉල්ලා සිටිනවා මේ වගේ සංශෝධන පනතක් ඉදිරිපත් වුනාට පසු ඔබ සතුව තිබෙන ලොකුම වගකීම වන රටේ ඒකීයභාවය භෞමික අඛන්ඩතාවය රැකීම උදෙසා නිර්භය සෘජුව නැගීසිටින ලෙස.” යැයි පැවසූහ.
