වනජීවි ඡායාරූප ශිල්පීන් අතරේ කාවන්තිස්ස්ස ගජබා ලෙසත්,ගැමියන් අතරේ මහ ඇතා ,කණ්ඩුල ලෙසත් ප්‍රචලිත සුවිසල් ඇත්රජු මේ වන විට ලංකාවේ සිටින උසින් වැඩිම දල ඇතා ලෙස සැලකෙයි.සාමාන්‍ය ඇතෙකුගේ උසට වඩා අඩි 1 ½ – 2ක් පමණ උසකින් යුතු මෙම ඇතා සතුව ඔහුගේ උසටම සරිලන අලංකාර තේජස් දනවන දල යුග්මයක් ද පිහිටා ඇත.මේ වන විට මෙම ඇත්රජුගේ වාසස්ථානය වී ඇත්තේ මිනිස් වාසස්ථානයන්ට ඉතා නොදුරින් මිනිස් ඇසුරේමයි.
සුවිසල් වන අලි ඇතුන්ටම ප්‍රකට වූ කලකට පෙර වනාන්තරයක්ව පැවති මේ වන විට මිනිස් ජනාවාස වී ඇති ප්‍රදේශවල වැව් සහ හේන් අශ්‍රයේ ඉතිරි වී පවතින වන ලැහැබවල්හි දිවා කාලයේ දී සැඟව සිට රාත්‍රියේ දී පමණක් ආහාර සොයා යමින් ඉතා දුක්ඛිත ජීවිතයක් ගත කරන මෙම කාවන්තිස්ස ඇත් රජුගේ ජීවිතය මේ වන විට අනතුරු දායක තත්ත්වයකට මුහුණ පා ඇත.
මොවුන් ජීවත් වූ වන ලැහැබවල් විනාශ කර එහි ජනාවාස පිහිටුවා මෙම ඇත් රාජයන්ට ඉදුම්හිටුම් මෙන්ම කුසගින්නට අහරක් සොයා ගැනීම අහිමිකර ඇත්තේ ද අපේම මිනිසුන් ය. අලිමිනිස් ගැටුම් යැයි පවසමින් අලිවැටවල් බඳිමින් මෙම සතුන් ඉතා කෲර ලෙස ඝාතනය කළ ද මෙවැනි තත්ත්වයක් උදාවී ඇත්තේ අපේම අයගේ ක්‍රියාකාරකම් නිසා බවද සිහි තබා ගත යුතුය. මහ වනාන්තර එලි කරමින් රූස්ස ගස් කපා දමමින් විනාශ කර ඒවායේ ජනාවාස පිහිටුවා පසුව අලි ඇතුන්ට කන්න අහරක් සොයා ගැනීමට හෝ වනාන්තරයක් නොමැති තැන ඔවුන් ගම්වැදීම සාමාන්‍ය කරුණක් සේ සැලකීමේ ද වරදක් නොමැත.
පසුගිය කාලයේ දී මෙම ඇතා ප්‍රදේශයේ ඇති ගොවිපලක් ආශ්‍රිතව ඇති වනගත ප්‍රදේශයක සැඟව කාලය ගතකර ඇත. නමුත් මේ වන විට එම ගොවිපල ආශ්‍රයේ ඇති කැලෑ ප්‍රදේශ එළිපෙහෙළි කිරීමට සහ අලි ඇතුන්ට ඊට ඇතුලු වීමට ඉඩ නොදීමට කටයුතු කරමින් සිටින බව සමාජ මාධ්‍ය සඳහන් කරයි.
මීට මාසයකට පමණ පෙර සිට කාවන්තිස්ස ඇතු ඇතුලු අලි කිහිපදෙනෙකු එක්තරා වැවක් ආශ්‍රිව ඇති කුඩා කැලෑ රොදක් සිය දිවා සැඟවුම් ස්ථානය වශයෙන් යොදානෙ ඇත. වැවක් සහ හේන් යායක් අතර පිහිටා ඇති මෙම කැලෑ රොද අක්කර 05 ක් පමණ වන අතර එහි අලි රංචුවකට තබා එක් අලියෙකුට හෝ සැඟව සිටීමට හැකිවේ දැයි වනජීවී නිලධාරීන්ට සිතන්නට තරම් හැගීම් සහ දැනීම් නැතිවා දැයි අපට සිතේ. . කෙසේ නමුත් ලංකාවේ උසම ඇතා ප්‍රමුඛ මෙම අලි 6-7 දෙනෙකුගෙන් යුතු කණ්ඩායම මාසයක පමණ කාලයක සිටි දිවි ගෙවන්නේ එම කුඩා කැලෑරොද තුළ වන අතර මේ වන විට පවත්නා දැඩි වර්ෂාපතනය සමග එම කුඩා කැලෑ රොදේ කොටසක් ද දැන් ජලයෙන් යටවී ඇත.
සැඳෑ කලුවර වැටෙන නිමේෂයට ඔවුන් කැලෙන් එළියට විත් සැරසෙන්නේ රංචුවම ගොස් කුසගින්නට යමක් සොයාගැනීමටයි.
ගම්මානයේ ඇති ගෙවතු සහ වැව වටේ ඇති හේන් යායවල් වෙත ගමන් ගන්නා ඔවුන්ට ලැබෙන්නේ සුහදශීලි පිළිගැනීමක් නම් නොවේ. එය විටෙක අලිවෙඩි වරුසාවක් වන අතර තවත් විටෙක කෑකෝ ගැසීමකි. තැනිත් තැනට ගොස් වෙහෙස දරන්නේ ඔවුන්ගේ විශාල උදයර පුරවා ගැනීමට විනා වෙනත් කිසිදු අරමුණකින් නොවන අතර ඔවුන් හිරු එළිය වැටීමට ප්‍රථම සිය සැඟවුම් ස්ථානය බලාද යා යුතුව ඇත.
මෙවන් දුෂ්කර දිවියක් ගත කළද මේ කාවන්තිස්ස ඇත් රජු මේ වන තෙක් මිනිස් ජීවිතයකට කිසිදු හානියක් කළ බවට වාර්තා වී නොමැත. බෙහෙවින් සාමකාමී දිවියක් ගෙවන මෙම ඇත්රජු ප්‍රදේශයේ බොහෝ ගැමියන් ද බෙහෙවින් ගරු කරති. නමුදු සෑම පුද්ගලයෙක්ම එසේ වෙතැයි අපට අපේක්ෂා කළ නොහැක.
මිනිසුන් අතර සිටිනා ඇත් දලවලට ගිජු වූ ඇතැම් නොමිනිසුන් මෙම සද්දන්තයා නැසීමට උත්සහ දැරිය හැකිය, නැතහොත් අලි පලවා හැරීමට තබනා වෙඩිල්ලක් මගින් ඇතාගේ මර්මස්ථානය සනිටුහන් කළ හැකිය. එමෙන්ම රාත්‍රියේ සහ පාන්දර ජාමයේ මෙම ඇතුන් සිය කුස පුරවාගැනීමේ අහිංසක අරමුණින් කඩිමුඩියේ සිදුකරන සංචාරයන්හි දී අනාරක්ෂිත විදුලි රැහැනකට බිලිවීමේ හැකියාව ද ඇත. අපේ රටේ ඇතුන් ගණනාවක් ම මෙවන් ඉරණමයන්ට මුහුණ දුන් අතර ඔවුන් මියගිය පසු කණගාටුවනවාට වඩා ජීවත්ව සිටියදී මෙම ඇත් රජුන් ආරක්ෂා කරගැනීමට කළ යුතු දේ නොපමාව සිදු කිරීම සැබවින්ම වටිනේය.
දළඳා වහන්සේ වඩම්මවන නැදුම්ගමුවේ රාජා හස්තියාට හමුදා ආරක්ෂාව ලබාදෙන රටක් තුළ මෙවන් ජාතික සම්පතකට ද හමුදා ආරක්ෂාව විනා වනජීවී දෙපාර්තමේන්තුවේ හෝ නිසි අවධානයක් නොලැබීම ඉතා කණගාටුදායක තත්ත්වයක් වී ඇත. ශ්‍රී ලංකාවේ දැනට ජීවත්ව සිටින උසම ඇතා වන මෙම දැවැන්ත කන්ඩුල හස්ති රාජයා පිළිබඳව වනජීවී දෙපාර්තමේන්තුවේ නිරන්තර අවධානය ලබා දීමට නොපමාව කටයුතු කළ යූතුව ඇති අතර මේ වටිනා ඇත් රජු පිළිබඳව ප්‍රදේශවාසීන් දැනුවත් කිරීමේ වැඩපිළිවෙළක් සංවිධානය කර හෝ එය ක්‍රියාවේ යෙදවීමට හැකියාව ඇත්නම් ඉතාමත් වටිනා සම්පතක් රැකගැනීමේ අවස්ථාව අප රටට හිමිවනු ඇත.
වන සතුන්ට ඇලුම් කරන මෙන් ම වනජීවී ඡායාරූපකරණයේ යෙදෙන සියලු දෙනාගේද අවධානය යොමුකර කළ හැකි යමක් වේ නම් නොපමාව එය සිදු කරන ලෙසත් මේ ඇත් රජුව රැක ගැනිම ඔබේත් අපේත් සියල්ලන්ගේම වගකීමක් මෙන්ම යුතුකමක් ලෙස සලකා කටයුතු කරමු.
සාමාජ මාධ්‍ය ඔස්‌සේ සංසරණය වූ තොරතුරු ඇසුරින් සකසන ලද්දකි. එසේම මෙම කාරණාව සත්‍යද ? අසත්‍යද යන්න සොයා බලා නිසි කටයුතු සිදු කිරීම නිසි බලධාරීන්ගේ වගකීම වේ.
