ලංකාදීප පුවත්පතේ මාධ්‍යවේදියෙකු වන ප්‍රගීත් සම්පත් කරුණාතිලක මහතා විසින් දිවයින පුවත්පතින් තමන්ට අපහාසයක් වූ බවත් දිවයින පුවත් පතේ කතෘ නාරද නිශ්ශංක මහතා තමන්ට තර්ජනය කල බවටත් සඳහන් කරමින් මෙම පැමිණිල්ල ඉදිරිපත් කර තිබේ. එම පැමිණිල්ලට ශ්‍රී ලංකා පුවත් මණ්ඩලය ප්‍රතිචාර දක්වා තිබේ. තමන්ට තර්ජනය කල බව පෙන්වන හඬ පටයක්ද ඔහු විසින් ඉදිරිපත් කර තිබේ. අදාළ හඬ පටය පහතින් ඇසිය හැකිය.
ප්‍රගීත් සම්පත් සම්පත් මහතාගේ පැමිණිල්ල.
2022-8-18
නිරෝෂණ තඹවිට, පුවත්පත් කොමසාරිස්තුමා,ශ්‍රිලංකා පුවත්පත් මණ්ඩලය,නො.155/55,කාසල්විදිය,කොළඹ.
දිවයින පුවත්පත මගින් අපහාස කිරීම සම්බන්ධව කරන පැමිණිල්ලයි.
මහත්මයාණෙනි,
ඉහත නම සදහන් මාගේ නමට අපහාස වෙන අන්දමේ පුවතක් 2022-08-09 අගහරුවාදා දිනපතා දිවයින පුවත්පතේ පළ විය.එම පුවත මගින් කියැවුණේ ” හමුදා නිලධාරියෙකුගෙන් මරණ තර්ජන ගැන ඇතැයි ප්‍රගීත් සම්පත් නැමැත්තා කර ඇති අසත්‍ය ප්‍රකාශය ගැන පරීක්ෂණයක් පවත්වන්න හමුදා නිලධාරියාගේ බිරිද පොලිස්පතිගෙන් ඉල්ලයි” යනුවෙනි.එම පුවත අන්තර්ගතයේද මාගේ නම සදහන් වූ අතර දිවයින පුවත්පත එමගින් මාහට දැඩි අපහාසයක් කර ඇත.
මාධ්‍ය ආචාරධර්මවලට අනුව එලෙස නමක් සදහන් වන්නේ නම් අනෙක් පාර්ශවයෙන් විමසීමක් කළ යුතුය.නමුත් දිවයින පුවත්පතේ කතුවරයා හෝ පුවත ලියු මාධ්‍යවේදියා මාගෙන් එකදු විමසීමක්වත් කර නැත.
මම මාධ්‍යවේදියෙකු ලෙස දැන්ට විජය පුවත්පත් සමාගමේ සේවය කරමි.එහිදි මා ලියු ගවේෂණාත්මක ලිපි පෙළක් හේතුවෙන් පසුගිය කාලයේ මරණ තර්ජන එල්ල විය.ඒ ගැන මා පදිංචි හෝමාගම පොලිසියට දැනුම් දුන්නද ඉන් සාධාරණයක් නොවිණි.එම නිසා ඒ ගැන පොලිස්පතිවරයාට පැමිණිලි කළෙමි.එලෙස පොලිස්පතිවරයාට යවන ලද ලිපිය ඇසුරෙන් සකස් කළ පුවතක් 2022-6-22 බදාදා දිනපතා දිවයින පුවත්පතේ පළ විය.”යුද හමුදා නිලධාරින් මරණ තර්ජන කළ බවට මාධ්‍යවේදී ප්‍රගීත් සම්පත් කරුණාතිලකගෙන් පොලිස්පතිවරයාට පැමිණිලක්” යනුවෙන් එය පළ විය.මෙම පුවතේ කිසිම තැනක මාහට මරණ තර්ජනය කළ හමුදා නිලධාරියාගේ නම සදහන් වූයේ නැත.
එහෙත් දිවයින පුවත්පත මගින් පළ කළ පුවතේ ප්‍රගීත් සම්පත් නැමැත්තා ලෙස සදහන් කරමින් සෘජුවම මාහට අපහාසයක් කර ඇත.විශේෂයෙන්ම මාධ්‍යවේදියෙකු ලෙසත් මාධ්‍ය ක්ෂේත්‍රයේ වසර 22ක නියැලි සිටින ප්‍රවීණයෙකු ලෙසත් දිවයින පුවත්පත මාගේ නම සදහන් කරමින් වැරැදි පුවතත් පළ කිරීම මගින් මාහට දැඩි අපහාසයක් සිදු වී ඇත.එමගින් මා මෙතෙක් දුක් විද ගොඩ නගාගත් නමට බරපතළ කැළලක් කොට ඇත.ජනතාව මා කෙරෙහි තැබූ විශ්වාසයට බරපතළ අවිශ්වාසයක් එක් කොට ඇත.කොටින්ම කියනවා නම් දිවයින පුවත්පත ප්‍රගීත් සම්පත් නැමැත්තා ලෙස මාගේ නම සදහන් කරමින් මා හොරෙකු වැරැදිකරුවෙකු ලෙස රට හමුවේ කියා ඇත.
2022-8-9 දිනම මේ පුවත නිවැරදි කොට පළ කරන ලෙස මම දිවයින පුවත්පතේ ප්‍රධාන කර්තෘ නාරද නිශ්ශංක මහතා වෙත ලිපියක් යැව්වෙමි.එම ලිපිය මගින් ඉල්ලා සිටියේ මාගේ නමට සිදු වූ අපහාසය ගැන කනගාටුව පළ කරමින් පළ වු ප්‍රවෘත්තිය නිවැරදි කරන ලෙසය. නමුත් ඒ වෙනුවට දිවයින පුවත්පත 2022-8-10 දින “මරණ තර්ජන කිරීම ගැන මා සිදුකර ඇත්තේ සත්‍ය පැමිණිලක් මාධ්‍ය වේදි ප්‍රගීත් සම්පත් කරුණාතිලක පුවත ගැන කරුණු පහදයි” ලෙස සදහන් කරමින් පුවතක් පළ කළේය.එම පුවත මගින් මාගේ නමට වූ අපහාසය ගැන නිවැරැදි කිරීමක් සිදු කළේ නැත.මාකියු අර්ථාද එම ලිපියෙන් පිළිඹිබු වූයේ නැත.
2022-8-9 දින මෙම පුවත පළ කිරීමේදි මාගෙන් කිසිදු ප්‍රකාශයක් නොගැනීම ගැන දිවයින පුවත්පතේ කර්තෘවරයාගෙන් විමසා සිටි අවස්ථාවේ ඔහු හැසුරුණේ පුවත්පත් කර්තෘවරයෙකු ලෙස නොවේ.පාතාල සාමාජිකයෙකු ලෙසිනි.” අපට ඕන නම් නිවැරැදි කිරීම දානවා.වැඩිය සද්ද දාන්න එන්න එපා.අපට ඕන දේ විතරයි පත්තරේ දාන්නේ ආදි ලෙසින් මාහට තර්ජනයද කළේය.(හඩපට ඇත.)
එම නිසා මා ඔබතුමාගෙන් ඉල්ලා සිටිනුයේ මේ සියලු කරණා ගැන සලකා බලා විධිමත් පරීක්ෂණයක් කොට මට සාධාරණයක් කරන ලෙසය.එසේ නොවුණහොත් දිවයින පුවත්පතට එරෙහිව නීතිමය පියවර ගැනීමට සිදුවෙන බවද කනගාටුවෙන් වුවද දන්වා සිටිමි.
