ඉහත මාතෘකාව යටතේ සදහන් ලියවිල්ලක් සමාජ මාධ්‍ය තුල සංසරණය වෙමින් පවතී. එම ලියවිල්ල පිලිබදව අප අවධානය යොමු කලේ එය තවත් නීතිවිරෝදී සම්මතයක් ජනතාවගේ ඔලුවට දමා නැවතත් රට අරාජික විය හැකි නිසාය. එම ලියවිල්ල පහතින් දක්වෙන අතර එහි සැබෑ නීතිමය පැතිකඩ ඊටත් යටින් “ ශ්‍රී රාවණා සටහන” ලෙස අප සදහන් කර තිබේ.
“රනිල්ට ආණ්ඩුක්‍රම ව්‍යවස්ථාවේ 40 වගන්තිය ක්‍රියාත්මක වීම නිසා 20 දා පාර්ලිමේන්තුවේදී පැවැත්වෙන රහස් චන්දයට නාම යෝජනා ලබා දීමට හැකි වන්නේ නැත.
රනිල් 15 දා දක්වා ජනාධිපති ධුරයේ වැඩබැලුයේ 37 වගන්තිය යටතේ ගෝඨාබය ජනාධිපති පත්කරන ලද අගමැති පදවියේ සිටි මන්ත්‍රීවරයා ලෙසටය.
නමුත් ජනාධිපති ගෝඨාබය ගේ ඉල්ලා අස්වීමත් සමග 40 වගන්තිය ක්‍රියාත්මක වීම ඇරඹෙන අතර එහිදී රනිල් තාවකාලික වැඩබලන ජනාධිපති බවට පත්වීමත් සමගම තම අගමැති තනතුරෙහි ඇබෑර්තුවක් ඇතිවන බව 40(ඇ) වගන්තිය පවසන අතර පවතින කැබිනට් මන්ඩලයේ සාමාජිකයකු පත් කල යුතු බව කියා ඇත.
ඒ අනුව ව්‍යවස්තාවට අනුව රනිල් වැඩබලන තාවකාලික ජනාධිපති ලෙස පත්වීමත් සමග ඔහු දැරෑ අගමැති තනතුර පමනක් නොව පාර්ලිමේන්තු මන්ත්‍රී ධූරනයද ශුන්‍ය වන්නේය.
ආ.ක්‍ර.ව්‍ය වේ 32(2) වගන්තියට අනුව ජනාධිපති ධුරය භාරගනු ලබන්නේ පාර්ලිමේන්තු මන්ත්‍රී වරයකු නම් ජනාධිපතිධුරය භාරගත් වහාම තමන්ගේ මන්ත්‍රී ධූරය අහෝසි වන බව ඉතා පැහැදිලිව දක්වා තිබේ.
32 වගන්තිය පැහැදිලිව කියා ඇත්තේ මෙම තත්වය ජනාධිපති චන්දයකින් පත්වු ජනාධිපති වරයාට මෙන්ම ජනාධිධූරයේ වැඩ බැලීමට පත්වන ජනාධිපති වරයාටද අදාල වන බවය.
ඒ අනුව බලන කල 40 වගන්තියට අනුව වැඩබලන ජනාධිපති ධුරයට නාම යෝජනා භාර ලබා දිය හැක්කේ සහ තෝරා පත් කර ගත හැක්කේ පාර්ලිමේන්තුව තුල සිටින මන්ත්‍රී වරයකුට පමනකි.
ඒ අනුව නීතිය ඉතා පැහැදිලිය.
රනිල්ට 20 දා පාර්ලිමේන්තුවේ පැවැත්වෙන රහස් චන්දයට නාම යෝජනා ලබා දීමට නීතියෙන් කිසිදු ඉඩ ප්‍රස්ථාවක් නැත.
ඒ නිසා රනිල් 20 දා මීලඟ වැඩබලන ජනාධිපති බවට බහුතර චන්දයෙන් පත්වීමට නොහැකිය. අඩුම තරමින් නාමයෝජනා ලබා දීමටද නොහැකි බව නීති විශාරදයින් කියා සිටි.
කරුනාකර ආ.ක්‍ර.ව්‍ය. 32 වගන්තියේ (1) හා (2) වගන්ති එක්ව ගෙන හොඳින් කියවන්න.”
ලෙස එහි සදහන් වේ.
ශ්‍රී රාවණා සටහන
මෙම සටහන තුල එක් කොටසක් සඟවා තිබේ. ඒ ශ්‍රී ලංකා ප්‍රජාතාන්ත්‍රික සමාජවාදී ජනරජයේ ආණ්ඩුක්‍රම ව්‍යවස්ථාවේ 40 වන වගන්තියයි. එසේම “අනුප්‍රාප්ත නීතිය” සහ “වැඩ බැලීම” යනු තවත් අවස්ථා දෙකකි. ආණ්ඩුක්‍රම ව්‍යවස්ථාවේ 32 (3) වගන්තිය තුල සදහන් වන අනෙකුත් කාරණා වලට අමතරව “ ජනාධිපතිවරයා මාස තුනකට එක් වරක් පාර්ලිමේන්තුවට සහභාගි විය යුත්තේය” ලෙසද සදහන් වේ.එසේම ආණ්ඩුක්‍රම ව්‍යවස්ථාවේ 40 වගන්තියට අනුව එහි ඇති අනෙකුත් කාරනාවලට අමතරව “ එහි මන්ත්‍රීවරයන් අතුරෙන් ජනාධිපති දූරයට පත් තෝරාපත් කර ගැනීමට සුදුසුකම් ඇති යම් මන්ත්‍රීවරයෙකු ජනාධිපතිවරයා ලෙස තෝරාපත් කර යුත්තේය” ලෙස සදහන් වේ. 40 වන වගන්තිය පුරාම අනුප්‍රාප්තික ජනාධිපතිවරයා පත් කර ගත්තේ කෙසේද යන්න සදහන වේ.
එහි වැදගත්ම කොටස වන්නේ 40 (ඇ) වගන්තියයි. ඉහත සදහන් වැරදි ලියවිල්ලට අවශ්‍යම පිළිතුර එහි සදහන් වේ. එයට අනුව “ නව ජනාධිපතිවරයා ධුරයේ කාර්‍ය භාරගැනීමත් අතර කාලය තුල අග්‍රාමාත්‍යවරයා ජනාධිපතිද ධුරයේ වැඩ බැලිය යුත්තේය” ලෙස සදහන් වේ. එසේම එහි 40 (2) වගන්තිය තුල ඉතාම පැහැදිලිව සදහන් වන්නේ, ආණ්ඩුක්‍රම ව්‍යවස්ථාවේ 32 වන වගන්තියේ (2) වැනි අනු ව්‍යවස්ථාවේ විදී විධාන හැර වැඩබලන ජනාධිපතිට අනෙකුත් සියලුම කටයුතු හැකි තාක් අදාළ වන බවයි.
ඒ අනුව අග්‍රාමාත්‍ය රනිල් වික්‍රමසිංහ මහතාගේ මන්ත්‍රී දූරය අහිමි වීමක් හෝ මන්ත්‍රී වරප්‍රසාද කිසිවක් අහෝසි වන්නේ නැත. ඉහත සදහන් ලියවිල්ල සමස්ත සමාජයම නොමග යවමින් විකුර්තිකර සකසා තිබේ. එබැවින් යමෙක් කයු දෙයක් නොව ඔබ විසින්ම සොයා බලා තීරණය කරන්නේ නම් ශ්‍රී ලංකාවක් ලෙස අපට නැගී සිටිය හැකි වනු ඇත.
අදාළ පුවත
