රත්නපුර ප්‍රදේශයේ පිහිටා ඇති ඇලෝසියස් විද්‍යාලය එම ප්‍රදේශයේ ඇති ප්‍රධානම විදුහලකි.එම විදුහලේ විදුහල්පති විසින් විදුහලේ සිසුන් කිහිප දෙනෙකු අපයෝජනයට ලක් කළ පුවතක් අප වාර්තා කරන ලද අතර ඒ සම්බන්ධයෙන් ළමා ආරක්ෂණ අධිකාරියට කරන ලද දැනුම්දීමකට අනුව ඒ පිළිබඳ විමර්ශන ආරම්භ කර අදාළ විදුහල්පතිවරයා අත්අඩංගුවට ගැනීමට කටයුතු කළ අතර පසුව ඔහු අධිකරණය වෙත ඉදිරිපත් කරන ලදී.ඉන් අනතුරුව ඔහුව රක්ෂිත බන්ධනාගාරගත කිරීමට පියවර ගෙන තිබුණි.
කෙසේ නමුත් අදාළ විදුහල්පති බේරා ගැනීම සඳහා රත්නපුර දිස්ත්‍රික්කයේ ප්‍රබල දේශපාලඥයෙක් සමග ආදි ශිෂ්‍ය සංගමය දැවැන්ත මෙහෙයුමක් එම දිනවල සිටම ක්‍රියාත්මක කරන ලදී. එහි දී ජාතික ළමා ආරක්ෂණ අධිකාරිය විසින් මෙම සිදුවීම සම්බන්ධයෙන් කරන ලද විමර්ශන කටයුතු කඩාකප්පල් වන අයුරින් මොවුන් ක්‍රියාකර ඇති බව වාර්තා වේ. එමෙන්ම ළමා ආරක්ෂණ අධිකාරිය විසින් එම සිදුවීම සම්බන්ධයෙන් විමර්ශන සිදුකිරීමට පත්කරන ලද පොලිස් සැරයන් වරයා ද එම කටයුතුවලින් ඉවත් කිරීමට මොවුන් කටයුතු කර ඇත.
මේ අතර මෙම සිදුවීම සම්බන්ධයෙන් අප විසින් සිදුකළ වැඩිදුර සොයාබැලීම් තුළදී Lanka Human Rights Enforcement Council නමැති මානව හිමිකම් සංවිධානයක් ජාතික ළමා ආරක්ෂණ අධිකාරිය හා එක්ව කටයුතු කරන බවට පැහැදිලි සාක්ෂි අපවෙත ලැබී ඇත. කෙසේ නමුත් එහි ක්‍රියාකාරිකයෙකු වන විදුහල්පතිට උපකාර කරන එම ලේඛම්වරයා තම පාසල වෙනුවෙන් ද විශාල වැඩකොටසක් සිදුකරන බවද දක්නට තිබේ. නමුත් අප මෙහිදී සටහන් කරනුයේ සැකකාර විදුහප්ලතිවරයා බේරාගැනීම වෙනුවෙන් සිදුකරන නීතිවිරෝදී මැදිහත්වීම් නිසා ඇලෝසියස් පාසලේද විනාශය සිදුවන බවයි. ඔවුන් කටයුතු කල යුත්තේ පරපුරක් විනාශ නොවන ලෙස හරි දේ හරි ලෙසත්, වැරදි දේ වැරදි ලෙසත් සිදුවීමට ඉඩ හරිමින්ය.
මේ වන විට වාර්තා වී ඇති අයුරින් උසස් පෙළ අවසන් කළ ශිෂ්‍ය නායකයින් ගණනාවක් පසුගිය කාලය පුරාම විද්‍යාලයේ මාධ්‍ය ඒකකයේ කටයුතු කර තිබූ අතර පාසල් හැරගිය එම සිසුන් විසින් මෙම විදුහල්පතිගේ උපන්දිනයට සුබ පැතුම් ද එක්කර තිබුණි.
ඊට අමතරව මයුරන් වනසුන්දර නමැති ආදි ශිෂ්‍යයකු විසින් සිය මුහුණු පොතේ “කුමන්ත්‍රණ පරදවමු සත්‍ය ජයගමු” මැයෙන් ආදි ශිෂ්‍ය සංගමය ශාන්ත ඇලෝසියස් විද්‍යාලය නමින් ඡායාරූප ගණනාවක් සටහන් කර තිබූ අතර පසුගියදා අධිකරණයේ පැවති නඩු විභාගය සඳහා ද ඇලෝසියස් විද්‍යාලයේ ආදි ශිෂ්‍ය සංගමයේ ලේකම්වරයා සහභාගී වී සිටි බව ද වාර්තා වේ.
මෙම මයුරන් වනසුන්දර නමැති පුද්ගලයා Lanka Human Rights Enforcement Council නමැති රාජ්‍ය නොවන සංවිධානයේ මහ ලේකම් බව සඳහන් වන අතර ඔහු සහ ළමා ආරක්ෂණ අධිකාරියේ නීතිය බලාත්මක කිරීමේ අධ්‍යක්ෂ නීතිඥ සංජීවනී අබේසිංහ සමග සමීප සම්බන්ධතාවයක් පවතින බවට මොහුගේ මුහුණු පොතේ සඳහන් ඡායාරූප ආදිය තුළින් ගම්‍යමාන වේ.
එමෙන්ම විදුහල්පතිගේ අතවරයට ලක් බව පවසන තවත් ළමුන් 07 දෙනෙකු පමණ විමර්ශන නිලධාරීන් විසින් හඳුනාගෙන ඇත. නමුත් එම සිසුන් තොරතුරු ලබා දීම මගහරින්නේ ආදී ශිෂ්‍ය සංගමයෙන් මෙන්ම සමහර ගුරුවරුන්ගෙන්ද බලපෑම් එල්ල වීම, ඇලෝසියස් විද්‍යාලයේ සිද්ධිය ජාතික ළමා ආරක්ෂක අධිකාරියට පැමිණිලිකල පුද්ගලයාගේ තොරතුරු සැකකාර විදුහල්පතිගේ පාර්ශ්වයට ලැබීම සහ සැකකාර විදුහල්පතිවරයා ප්‍රදේශයේ අධ්‍යාපන පරීක්ෂකවරයෙකු ලෙස පත් කිරීම නිසා ද ඇතිව තිබෙන බලපෑම් නිසා බවද අප වෙත තොරතුරු ලැබී තිබේ.
මේ වන විටත් වින්දිතයකු බවට පත්ව සිටින සිසුවාට සහ ඔහුගේ පවුලේ උදවියට මෙන්ම ශිෂ්‍යයා වෙනුවෙන් සාක්ෂි ලබාදුන් ගුරුවරයෙකුට ද පාසලේ ආදි ශිෂ්‍ය සංගමයේ දැඩි බලපෑමට ද ලක්වීමට සිදුව තිබෙණ බවට හඬපට සහිත සාකච්ඡා කිරීම් අපවෙත ලැබී ඇත.
මෙහි විශාලම බලපෑම වී ඇත්තේ එම වින්දිත දරුවා ඇතුලු පාර්ශවය පත්ව සිටින තාඩන පීඩන හමුවේ අනෙකුත් වින්දිත දරුවන් සම්බන්ධ පරීක්ෂණ කටයුතු කිරීමට නොහැකිව තිබෙන බව වන අතර මේ වන විට ඒ සම්බන්ධ සාක්ෂි ද අප වෙත අනාවරණය වී ඇත. නමුත් ඕනෑම පුද්ගලයෙකු වරදක් කල බවට සැක කරන්නේ නම් ඔහුව නිවැරදි කිරීමට බලපෑම් කිරීමෙන් සිදුවන්නේ දැවැන්ත සමාජීය විනාශයකි. එබැවින් කල යුතුව තිබුනේ නිවැරදි ලෙස පරීක්ෂණ කටයුතු සිදු කිරීමට ඉඩ හැරීමය. එම සිද්ධිය යම් කුමන්ත්‍රණයක්ද, නැද්ද යන්න අනාවරණය වන්නේ සාධාරණ පරීක්ෂණයකින් වන අතර නඩු විභාගයෙදී සැකකාර විදුහල්පතිවරයා නිදහස් කෙරුණත් දැනට සිදුව තිබෙන කරුණුවලට අනුව ඔහු නිවැරදි පුද්ගලයෙකු ලෙස සමාජය පිලි නොගනී. ඉන් හානිය සිදුවන්නේ සැකකාර විදුහල්පතිටම වන අතර යම් අයුරකින් විදුහල්පතිවරයා වැරදිකරුවකු බවට පත් වුවහොත් බලපෑම් කල සියලුම පාර්ශ්වයන්වලටද, පාසලටද සිදුවන්නේ දැඩි අසාධාරණයකි.
මෑතකදී අප මාධ්‍ය විසින් ද කැබිනට් තීරණ දැනුම්දීමේ මාධ්‍ය සාකච්ඡාවේදී ද ශ්‍රී ලංකාවේ දරුවන් හට බලපුලුවන්කාර පාර්ශවයන් විසින් එල්ල කරන තාඩන පීඩන පිළිබඳව කැබිනට් මණ්ඩලය දැනුවත් කරන ලදී.මේ වන විට ශ්‍රී ලංකාව පුරාම සිසු දරුදැරියන් විශාල ප්‍රමාණයක් ගුරුවරගුරුවරියන් අතින් , විදුහල්පතිවරුන්ගෙන් මෙන්ම සාධාරණයක් අපේක්ෂාවෙන් යන පොලිස් ස්ථානයෙන් පවා දරුවන් පමණක් නොව ඔවුන්ගේ වැඩිහිටියන් ද පීඩාවලට ලක් කරති.
කෙසේ නමුත් මෙවැනි ගැටලු රාශියක් පැවතිය ද ඇලෝසියස් විද්‍යාලයේ ගුරුවරුන් ඉතාමත් විනෝදකාමී දිවියක් ගතකරන අතර දරුවන්ට යහමග පෙන්වන ගුරුවරුන්ගේ අරක්කු බීමේ සාදයකදී තරගයකට අරක්කු බීමේ සාදයක්ද පවත්වා තිබේ .විශාල වියදමක් දරමින් සංවිධානය කර තිබූ මෙම සාදයට පැමිණි විදුහල්පති මෙන්ම ගුරුවරුන් ද මතින් මත්ව නටමින් ගයමින් කාලය ගත කළ අයුරු සටහන් වීඩියෝ පටයක් ද අපට හමු විය.
පොලිස් නිලධාරීන් මෙන්ම වැඩිහිටියන්ද දරුවන්ට එරෙහිව කටයුතුකරන බවට අප පෙන්වා දුන් ආසන්නතම සිද්දිය වාර්තා වන්නේ හොරණ මිල්ලනිය පාසලේ සිධියයි .ජාතික ළමා ආරක්ෂණ අධිකාරිය දිගින් දිගටම සිදුකරනුයේ විශාල අපයෝජන සිදුවීම් අල්ලා කුඩා සිදුවීම් සියල්ල යට ගැසීමයි.අනතුරුව කාලයත් සමග යටපත් වූ අපයෝජන සමාජයට පිළිළයක්ව යළි දලුලා වැඩෙයි.අප වාර්තා කරන ලද රත්නපුර ඇලෝසියස් විද්‍යාලයේ සිදුවීම ද පන්නල්ගම,දමන ,අම්පාර පන්නල්ගම විදුහලේ අමානුෂික ලෙස සිසුවෙකුගේ කනට පහර දුන් විදුහල්පතිනිය දමන පොලිසිය විසින් අධිකරණයට කරුණු වාර්තා කිරීමකින් තොරව පොලිස් ඇප මත මුදා හැරීම,ගොඩකවෙල රාහුල ජාතික පාසලේ ක්‍රීඩා උපදේශකවරයෙකු විසින් පොල්ලකින් පහරදී සිසුවෙකුගේ අත කැඩීම, මැදමුලන ඩී.ඒ.රාජපක්ෂ විදුහලේ විදුහල්පති ඇතුලු ගුරුවරුන් විසින් සිසුවෙකු ප්‍රසිද්ධියේ අපයෝජනය කිරීම, කෑගල්ල ධර්මපාල විද්‍යාලයේ සිසුවෙකු මරණයට පත්වූ සිද්ධිය, වාරියපොළ දරුවන් සිව්දෙනෙකුට කෘර ලෙස වදහිංසා ලබාදුන් මවගේ 24 හැවිරිදි පෙම්වතාගේ සිද්ධිය, මහරගම විද්‍යාකර බාලිකා විද්‍යාලයේ සිසුවෙකුට අමානුෂික ලෙස පහරදීම ආදී සිදුවීම් සම්බන්ධයෙන් ගතයුතු කිසිදු ක්‍රියාමාර්ගයක් ගැනීමට මෙම අධිකාරිය අපොහොසත් වී ඇති බවට වින්දිත පාර්ශවයන් චෝදනා එල්ල කරයි.
එමෙන්ම ළමා ආරක්ෂක අධිකාරියට එරෙහිව එල්ලවන චෝදනා ගණනාවක් අතර එල්ලවන දරුණුම චෝදනාව වන්නේ ඔවුන්ට අවශ්‍ය පැමිණිලි පමණක් තෝරාබේරාගෙන විභාග කිරීමයි. පහතින් දැක්වෙන්නේ වීරකැටියේ සිසුවාට පොලීසිය සහ පාසලේ විදුහල්පතිගේ තක්කඩි ක්‍රියාවලියේ එක් අවස්ථාවකි.
