(විශේෂ ලියුම්කරුවෙකු විසින් ලියන ලදී)
“හොර අඹුවට ෂොපින් යන්න හමුදා වාහනයක් නුවරට පැන්නූ බ්‍රිගේඩියර්”.
“මාස තුනට ඩීසල් ලීටර් 1600 ක් ( රුපියල් 640,000) අවභාවිතා කරලා.“
“ආරක්ෂක ලේකම්ගේ නිල නිවසේත් අයිස් ගහලා.
අයිස් ගංජා ප්‍රවාහනයට තරු දෙකේ වාහන“
බඩට දැනෙන ආර්ථික අර්බුදයකට රටම මුහුණදී ඇති පසුබිමක උජාරුවට 75 සමරන ජනාධිපති රනිල් වික්‍රමසිංහ පීඨිකාවෙ හිටගෙන තමා ඉදිරියෙන් ගමන් කරන සෙබල සෙබළියන්ගේ ආචාර , සමාචාර, සම්මාන, උත්තමාචාර ලබනට දීර්ඝ දේශපාලන ජීවිතයේ පළමුවරට වාසනාව ලැබූද ඒ සඳහා සේනාධි නායකයා ලෙස ඔහුට සදාචාරාත්මක අයිතියක් ඇද්ද යන්න පිළිබඳව අපට ඇත්තේ සාධාරණ සැකයකි.
නිදහස් දින හමුදා පෙළපාලියේ සෙබල සෙබලියන් දකුණ බලා රනිල් වික්‍රමසිංහගේ මුහුණට කෙලින්ම කටින් නැතිවුනත් හිතින් කියන්නේ අඩුම තරමින් අපිට හිමි බත්පතේ අයිතියවත් ආරක්ෂා කරලා දෙනවාද ජනාධිපතිතුමා වන්නට පුළුවන.
හමුදාවේ පොඩි මිනිහා වෙනුවෙන් කවදත් කොන්දේසි විරහිතව පෙනී සිටින අප උන්නැහේලාගේ බත්පත මහ දවල් මංකොල්ලකෑම පිළිබඳව හඬ අවදි කළද හද නොදැක ඇඟිල්ල දැකපු ආරක්ෂක ලේකම් අපට තොරතුරු ලැබෙන ආකාරයේ සෙවීමට වෙහෙසුනා මිස සෙබල සෙබළියන් හට පොදු මහජනතාවගේ බදු මුදලෙන් රජයෙන් හිමි ගන්වා ඇති බත් පතේ අයිතිය සුරැකීමට අපොහොසත් විය.
මෙම සිද්ධියට සම්බන්ධ එම දූෂිත අණදෙන නිලධාරිවරයා නැවතත් එම තනතුරේම හිද වූයේ දින 14ක් සිර අඩස්සියේ සිට සෙබළුන්ගේ ආහාර මංකොල්ලයට වැරදිකරුවී නැවතත් අණදෙන නිලධාරී තනතුරට පත්වූ ලෝකයේ පළවෙනි හමුදා නිලධාරියා ලෙස මේජර් ප්‍රසන්න වන්නිආරච්චිගේ නම ඉතිහාසයට එක් කරමින් ත්‍රිවිධ හමුදාවටම වැරදි පූර්වාදර්ශයක් ලබාදෙමිනි.
යුද හමුදාපතිට බලපෑම් එල්ල කරමින් ආරක්ෂක ලේකම් විසින් ගනු ලබන අත්තනෝමතික නින්දිත මෙන්ම හිතුවක්කාර තීන්දු තීරණ සමස්ත යුද හමුදාවම හෑල්ලුවට ලක්කිරීම අවාසනාවන්තය.
යු හ 50849 නුවරට උස්සපු බ්‍රිගේඩියර්
යුධ හමුදා වැටුප් හා ලේඛන අධ්‍යක්ෂ මණ්ඩලය පනාගොඩ හමුදා ජනපදයේ ස්ථාපනය කර ඇති අතර එහි අධ්‍යක්ෂවරයා ලෙස කටයුතු කරනු ලබන බ්‍රිගේඩියර් ප්‍රියන්ත අබේසිංහ නම් කුප්‍රකට දූෂිත නිලධාරියෙකි.
එම අධ්‍යක්ෂ මණ්ඩලයේ නිලධාරීන්ගේ සහ සෙසු නිළියන්ගේ රාජකාරි ප්‍රවාහන අවශ්‍යතාවයන් සඳහා රජය විසින් විශාල මුදලක් දරමින් සිවිල් පුරවැසියෙකුගේන් කුලී පදනම මත යු හ 50849 අංක තහඩුව යටතේ යුද හමුදාවට KDH වර්ගයේ වෑන් රථයක් පවරාගෙන ඇත.
හමුදා නීති රීති මහ දවල් අමු අමුවේ උල්ලංඝනය කරමින් රාජ්‍ය දේපළක් වන මෙම වෑන් රථය මෙන්ම මහජනතාවගේ මුදලින් ඒ සඳහා රුපියල් 640000 වටිනාකමින් යුතු ඉන්ධන (ලීටර් 1600 ක්) අවභාවිතා කරමින් රජය මගින් පඩි ගෙවන යුදහමුදා රියැදුරෙකු යොදවා මාස තුන හතරක කාලයක සිට අනවසරයෙන් තමාගේ හොර අඹුවගේ සුඛ විහරණයට මොහු විසින් මෙම වෑන් රථය අත්තනෝමතික අයුරින් නුවර ප්‍රදේශයේ ස්ථානගත කර ඇත.
රාජකාරී අවශ්‍යතාවයන් සඳහා යුද හමුදාවෙන් ලබාදී තිබෙන රථ වාහන මෙලෙස අවභාවිතා කිරිම හේතුකොට කාෂ්ඨක අව්වේ යතුරුපැදිවල නැගී රාජකාරි අවශ්‍යතාවයන් ඉටු කිරීමට වසර විසි දෙකක සේවාකාලයක් ඉක්මවූ මේජර් වරුන්ටද සිදුවී ඇති පසුබිමක සෙබලුන් ගැන කුමන කතාද
වැටුප් හා ලේඛන දෙකම කපෝති
දෙවන ලුතිනන් වරයෙක් වශයෙන්1993 මාර්තු මස කන්තලේ ප්‍රදේශයේදී ශ්‍රී ලංකා ජාතික ආරක්ෂක බලමුළුව සෙ/20260 ලාන්ස් කෝප්‍රල් සිසිර කුමාර ඩී එම් ඒ යන සෙබලා දිවි පරදුවට තබා ක්‍රියාන්විතයේ යෙදී මසකදී උපයාගත් රුපියල් 1785ක් වන සමස්ත වැටුප සොරකම් කිරීම සබැඳිව 1949 අංක 17 දරණ යුද හමුදා පනතේ ඡේද අංක 107 යටතේ වැරදිකරුවෙකුව දඩුවම් ලබා ඉන් අනතුරුව මේජර් වරයෙක් වශයෙන් දියතලාව යුධ හමුදා විද්‍යාපීඨයේදී 2003 දෙසැම්බර් 17 වන දින කැඩෙට් නිලධාරීන් හට හිමි ආහාර වංචාකර ලියකියවිලි වෙනස් කිරීමේ වරදට1949 අංක 17 දරණ යුද හමුදා පනතේ ඡේද අංක 116 යටතේ දඬුවම් ලබා එම දඬුවම් සබැඳිව සියලු චෝදනාපත් ලිපි ගොනු වලින් ඉවත් කර බ්‍රිගේඩියර් නිලයට උසස් වුණු මෙම බ්‍රිගේඩියර් ප්‍රියන්ත අබේසිංහ හට සමස්ථ යුධ හමුදාවේම බිලියන නමයක වැටුප් හා දීමනා මෙන්ම හමුදා සාමාජිකයන් සහ ඔවුන්ගේ පවුල්වල සාමාජිකයන් ලක්ෂ 10කගේ පමණ තොරතුරු ඇතුළත් ලේඛන සබැඳිව සියලු වගකීම් භාරදී තිබීම හාස්‍යයට කෙසේ වෙතත් කුතුහලයට කරුණකි.
මෙම දූෂිතයා සමස්ත හමුදාවේම වැටුප් හා ලේඛන අධ්‍යක්ෂවරයා වශයෙන් නිර්දේශ කර ඇත්තේ කුප්‍රකට මේජර් ජෙනරාල් මෙත්තානන්ද විසින් වන අතර මෙත්තානන්දගේ හොර කල්ලියේ ජේෂ්ඨතමයාවීම ඔහු ලද එකම සුදුසුකමවේ.
මෙම බ්‍රිගේඩියර්වරයා මීට පෙර යුධ හමුදා සාමාජිකයන්ගේ අර්ථසාධක අරමුදල අධ්‍යක්ෂවරයා ලෙස කටයුතු කර සමයේද දූෂණ රැසක් සිදුකර ඇති අතර ඒ පිළිබඳ ලිපි ලේඛන ලියවිලි මේ වන විටද අප සතුව පවතී. ඉදිරි දින කිහිපය තුළදී ඒ පිළිබඳව සවිස්තරාත්මක ලිපියක් පළකරන්නෙමු
ලේකම් නිවසෙනුත් අයිස් මතුවෙයි
“අයිස් මේරටෙන් තුරන් කරනවා ” යයි ආරක්ෂක ලේකම් මාධ්‍ය ඉදිරියේ අධි පොළොවේ ගසමින් හඬ නැගූවද පසුගිය දිනකදී ආරක්ෂක ලේකම්ගෙ පෞද්ගලික ශාරීරික යෝග්‍යතා පුහුණුකරු වන හමුදා සාමාජිකයෙකු ලේකම් නිල නිවසටම අයිස් ගෙන්වා භාවිතාකල පසුබිමක කෝප්‍රල් සුසිරිපාල මෙත්තානන්දගේ තරු දෙකේ වාහනේ අයිස් , ගංජා පනාගොඩ කඳවුරට ගෙනැවිත් ව්‍යාපාරයෙ යෙදෙන බව ආරක්ෂක ලේකම් නොදැන සිටීම පුදුමයට කරුණක් නොවන්නේය.
මීට මාස දෙකකට පෙර යුද හමුදා රංග කලා අධ්‍යක්ෂ මන්ඩලයේ සේවයේ නියුතු පුද්ගලයෙක් අයිස් භාවිතා කළ බව දැනගැනීමෙන් අනතුරුව ඒ සබැඳිව නීතිය ක්‍රියාත්මක කර තිබියදීත් එම ස්ථානයේ සේවය කරමින් තමා ඇසුරු කරන කාන්තාවකගෙන් ලද තොරතුරක් මත පැය 24ක් යාමටත් මත්තෙන් එම අධ්‍යක්ෂ මණ්ඩලය අධ්‍යක්ෂවරයාව එම තනතුරෙන් ඉවත් කළ ආරක්ෂක ලේකම් තමාගේ ඇඟ සම්බාහනය කරන පුද්ගලයා වන ගජබා රෙජිමේන්තුව ලාන්ස් කෝප්‍රල් වරයෙක් අයිස් ගසා අසූ කළ නම්බු පිට තනතුරෙන් ඉල්ලා අස් විය යුතුය. තමන්ගේ නිල නිවස අයිස් වලින් මුදවා ගැනීමට නොහැකියි ආරක්ෂක ලේකම් මෙරට අයිස් කෙසේනම් තුරන් කරයිද? ජනාධිපති වශයෙන් රනිල් වික්‍රමසිංහ මේ පිළිබඳව නොදන්නවාද නොඑසේ නම් නොදන්නවාසෙ ඉන්නවාද?.
හැත්තෑපස් වසරක් සමස්ත ජනතාවගේම කර මත පැටවුණු උසුලාගත නොහැකි ජීවන වියදම බඩටද දැනෙන කාලයක පොදු මහජනතාවගේ මුදල් මෙලෙස අවභාවිතා කරමින් නීති විරෝධී ක්‍රියාවල නිරතවූ සහ තවදුරටත් නිරතවෙන මෙවැනි මේජර් ජෙනරාල්වරුන් බ්‍රිගේඩියර් වරුන් මෙන්ම අණදෙන නිලධාරි වරුන් තරාතිරම නොබලා නීතිය ඉදිරියට ගෙනයාමේ වගකීම ආරක්ෂක ලේකම්ගෙන් ඉටුනොවන පසුබිමක සේනාධි නායකයා ලෙස ජනාධිපති රනිල් වික්‍රමසිංහගේ මැදිහත් වීම අනර්ථයට පත්වූ සෙබල සෙබලියන් නිදහසේ 75 සමරන මොහොතේ බලාපොරොත්තු වනු නොඅනුමානය.
(විශේෂ ලියුම්කරුවෙකු විසින් පිලිගත හැකි සාක්ෂි මත මෙම ලිපිය සකසා තිබේ. මෙම චෝදනාවන්වලට ලබාදෙන පිලිතුරුද පලකිරීමට අප බැදී සිටී. එසේම අදාල බලධාරීන් මෙම චෝදනාවලට එකින් එක පිලිතුරු ලබා දීමතුලින් සමාජය තුල යම් වැරදි මතයක් තිබේ නම් එයද ඉවත්වනු ඇත. ලියුම්කරු මෙවැනි ලිපියක් ඉදිරිපත් කරනුයේද එවැනි සමාජ මතයක් තිබෙන නිසාය)
