කොළඹ කුරුණැගල මාර්ගයේ පුහුරිය හන්දිය අසලදී සිදු වූ රිය අනතුරකින් රාත්‍රී ජංගම සංචාර රාජකාරියේ යෙදී සිටි පොලිස් කොස්තාපල්වරයෙකු ජීවිතක්ෂයට පත්ව ඇති බව වාර්තා වේ.
ඊයේ (09) රාත්‍රීයේ පොල්ගහවෙල පොලිස් ස්ථානයට අනුයුක්ත පොලිස් නිලධාරීන් තිදෙනෙකු රාත්‍රී ජංගම සංචාර රාජකාරී කැබ් රථයක් මාර්ගය අසල නවතා මාර්ගයේ ගමන්ගත් වාහන හා පුද්ගලයින් පරීක්ෂා කරමින් සිට තිබේ.
එම අවස්ථාවේ දී කන්තලේ දෙස සිට කඩුවෙල දෙසට වැලි ප්‍රවාහනය කරමින් තිබූ ටිපර් රථයක් මාර්ගය අයිනේ සිටි පොලිස් කොස්තාපල්වරයෙකුගේ ශරීරයේ ගැටී තිබේ.
පසුව පොලිස් කොස්තාපල්වරයා මාර්ගයේ ඉදිරියට විසිවී ගොස් ඉදිරියෙන් නවතා තිබූ කැබ් රථයක පිටුපස ගැටී බරපතළ තුවාල ලබා ඇති බව සදහන්.
පොලිස් කොස්තාපල්වරයාව පොල්ගහවෙල රෝහලට ඇතුළත් කර වැඩිදුර ප්‍රතිකාර සඳහා කුරුණෑගල රෝහලට ඇතුළත් කිරීමේ දී මියගොස් තිබේ.
එලෙස මියගොස් ඇත්තේ 45 හැවිරිදි, ගිරාබේ, පොල්ගහවෙල ප්‍රදේශයේ පදිංචි පොල්ගහවෙල පොලිස් ස්ථානයට අනුයුක්ත පොලිස් කොස්තාපල්වරයෙකි.
අදාළ ටිපර් රථ රියදුරු අත්අඩංගුවට ගෙන ඇති බව වාර්තා වේ.
