පේරාදෙණිය විශ්වවිද්‍යාලයේ සැමට විවෘත දිනයක්.

ශ්‍රි ලංකාවේ කීර්තිමත්ම හා සුන්දරතම විශ්වවිද්‍යාලය වන පේරාදෙණිය විශ්වවිද්‍යාලය විසින් 2023 .07.01 දින විවෘත දිනයක් (OPEN DAY) ප්‍රකාශයට පත් කර ඇත.

මහනුවර දිස්ත්‍රික්කයේ පේරාදෙණිය නගරයට ආසන්නව හන්තාන කඳු පන්තියේ බටහිර බෑවුම හා මහවැලි නදිය අතර ඉතා මනරම් පරිසරයක පිහිටා ඇති පේරාදෙණිය විශ්වවිද්‍යාලය ආරම්භ කර වසර 80 ක් පීරිමට සමගාමීව මෙම විවෘත දිනය ප්‍රකාශයට පත්කර තිබේ. ශ්‍රි ලංකාවේ විශ්වවිද්‍යාලයක් මෙලෙස මහජනයාට විවෘත දිනයක් ප්‍රකාශයට පත් කර ඇත්තේ ඉතිහාසයේ පළමු වරට වන අතර 2023 ජුලි 01 වන දින මෙලෙස පේරාදෙණිය විශ්වවිද්‍යාලය සිය විවෘත දිනය ලෙස මෙලෙස ප්‍රකාශයට පත් කර ඇත.

ඒ අනුව එදිනට විශ්ව විද්‍යාලයේ සියළුම පීඨයන් මහජනතාව වෙනුවෙන් විවෘතව තැබෙන අතර විවෘත දිනයේ සමාරම්භක උත්සවය සනාතන මන්දිරය හා විශ්වවිද්‍යාලයේ පොළොන්නරුව ආශ්‍රිත ප්‍රදේශයේ පැවැත්වීමට කටයුතු සංවිධානය කර ඇත. ලොව සුන්දරතම විශ්වවිද්‍යාලයන් අතර නම රැන්ඳූ පේරාදෙණිය විශ්වවිද්‍යාලයේ සුන්දරත්වය සියැසින්ම විඳගැනීමට මෙන්ම විශ්වවිද්‍යායීය ආචාර්ය මණ්ඩලය හා විද්‍යාර්ථයින් හමුවීමටත්, ඔවුන් සමඟ සාමූහිකත්වයෙන් කටයුතු කර විවිධ අංශයන්ගේ හා විවිධ පාඨමාලාවන්ගේ අධ්‍යාපන පරාසයන් පිළිඹඳව අවබෝධයක් ලබාගැනීමටත් මෙම විවෘත දිනයේදී “Open Day 2023” ඔබට අවස්ථාව හිමිවේ.

එසේම එදින විශ්වවිද්‍යාලයට පැමිණෙන ඔබට විශ්වවිද්‍යාලය වටා මාර්ගෝපදේශනය සහිත චාරිකාවන්ට සහභාගි වීමට, විද්‍යා ප්‍රදර්ශනයන් නැරඹීමට මෙන්ම නර්තන, ගායන හා සංස්කෘතිකාංගයන්ගෙන් සමන්විත අංගයන්ද දැක බලා ගැනීමට අවකාශය සැලසෙනු ඇත. එසේම ආහාර පාන වර්ග සහිත වෙළඳ කුටි මෙන්ම විද්‍යාර්ථයින්ගේ සමිති හා සමාජයන් පිළිඹඳව දැනුවත් කිරීම සඳහා ඉදිවූ ප්‍රදර්ශන කුටි විශාල ප්‍රමාණයක් ද උත්සව භූමිය තුළ දී ඔබට දැකගත හැක. තවද උසස් අධ්‍යාපනය පිළිබඳ ඔබේ ගැටළු හා විමසීම්වලට පිළිතුරු ලබාදීමට ඒ සෑම ස්ථානයකම රැදී සිටින විද්‍යාර්ථයින් සමඟ ඔබට අදහස් හුවමාරු කර ගැනීමටද ඉඩ හසර සැලසෙනු ඇත.

එපමනක් නොව විශ්වවිද්‍යාලය සතු විද්‍යාගාර පහසුකම්, පුස්තකාල පහසුකම් හා අනෙකුත් අධ්‍යාපනික සම්පත් මෙන්ම කලා කටයුතු සම්බන්ධ විශේෂිත ස්ථානයන් හා තත්වයන් පිළිඹඳව විශ්ලේෂණය කිරීමට ද මේ මගින් අවස්ථාව හිමිවේ.යම් දිනයක පේරාදෙණිය විශ්ව විද්‍යාලයට ඇතුලත් වීම උසස් පෙළ හදාරණ සිසුවකු ගේ සිහිනයක් නම් එදිනට පේරාදෙණිය විශ්වවිද්‍යාලය තුල ඔබ වෙනුවෙන් මඟ බලා සිටින පර්යේෂණ හා නව නිපැයුම් අවස්තා හඳුනා ගැනීමට ද මෙය මහඟු අවස්ථාවකි.

පේරාදෙණිය විශ්වවිද්‍යාලය විසින් 2023 වර්ෂය වෙනුවෙන් සංවිධානය කරනු ලබන මෙම  උත්කර්ෂවත් “Open Day 2023” සඳහා  සැමට විශ්වවිද්‍යාල පාලනාධිකාරිය  ගෞරවාන්විතව ආරාධනය කරයි.

( සරත් සමරනායක )